SHILLONG: Ia sal somoirango Meghalaya a·dokni pilak a·jarangon college-rang nambatahani gimin Shillong songjinmani college-rango poraina re·bagiparang komiengaha ine Robibar salo, a·dokni Education Minister Rakkam A Sangma a·kangataha.
“Skang somoirangode dingtang dingtang a·jarangoni chatro chatrirang, Shillong-o poraina re·batokrongachim indiba da·o bang·bata a·jarangon college-rang nambatahani gimin Shillong-ona re·bana gita nangtokjaengaha,” ine Sangma aganaha.
Shillong songjinmani mingnamgipa institute-ko chalaienggipa mande saksa baksa uni tom·e chanchirimani bidingo janapatengon, “Skangode college-rango sak 3500-mang ong·pile chatro chatrirang, admission-ko ra·rongachim indiba da·ode admission-ko ra·giparang sak 1500-mangan ong·jaengani a·sel ia institute-o skigiparangna dormaharangko on·anio neng·nikanirangko angna aganaha,” ine Education Minister parakataha.
Education Minister-ni talatani gitade, private college-rang bang·batan chatro chatrirangoniko gilenggipa fees-rangchisa skigiparangni dormaharangko on·engachim aro da·o ia college-rango admission ra·enggipa chatro chatrirang sak 100-mangni gita komiengani a·sel chu·onga gita fees-rangko man·tokjaengaha.
“A·jatangtangon da·ode namnamgipa college-rang dongahani gimin chatro chatrirang, Shillong-ona re·bae poraina nangjaengaha,” ine Sangma aganaha.
A·songni jakgitel ong·na skangonin Meghalaya a·doko mingnamgipa skul aro college-rang donga ine janapatskaengon, salgro salaram jolo Meghalaya a·dokba education hub ong·jaha ine agananirangko Education Minister talbatate on·aha.
“Ia sal somoirango, Nagaland, Mizoram aro salgro salaramni pilak a·dokrangon namroro silroroanirangko nikna man·engahani gimin ia a·dokrangba da·ode an·tangtangni namnamgipa university aro college-rang dongtokaha aro iani giminsa da·ode college-rango poraina gita Meghalaya a·dokona re·baenggiparang komibataha,” ine Sangma aganaha.
