TURA: Jasani dormahako on·na gita adita salrangna skangan Shillong-o donggipa SPD office SEMAM-oni sanction order-ko pilak a·jarangnan on·atmanahaoba da·alona kingkingan dormahako skigiparangni personal bank-ona watatkujaenga ine All Garo Hills SSA School Teachers Association (AGHSSASTA) parakatenba, July jani dormahako ta·raken skigiparangni account-rangona watatchina a·dok sorkariko didiataha.
Iani bidingo AGHSSASTA, memorandum-ko West Garo Hills a·jani Deputy Commissioner-ni jako a·dokni Chief Minister Conrad K Sangma-na on·ataha.
Association-ni Chief Minister-na sedoatgipa chittio janapatani gitade, skigiparangna jasani dormahako on·na gita adita salrangna skangan Shillong-o donggipa SPD office SEMAM-oni sanction order-ko a·dokni pilak a·jarangnan on·atmanahachim aro ia order-ko office-onin on·atmanahaoba, Shillong-o SSA-ni non-teaching staff-rang jingjengatengani gimin skigiparangni dormahako uamangni peount-rangona watatskakujaengachim.
Iani a·selan Meghalaya a·dokni SSA skulrango kam ka·enggipa skigiparang an·tangtangni kamrangko ka·anio neng·nikanirangko chagrongna nangtokenga ine janapatengon, skigiparangni neng·nikanirangko chel·chakna gita iani bidingo ta·raken kamrangko niatchina AGHSSASTA, a·dokni Chief Minister-ko didiataha.
