TURA: West Garo Hills a·jani Tikrikilla jolo donggipa Dolwakgre songo Fair Price Shop (FPS)-ko chalaienggipa mande, songni manderangna kragija dakronga aro bosturangko name sualrongja ine matnangenba, ia FPS dealer-ni kosako nanga gita ja·kurangko de·china Constitutional Rights Forum (CRF) Tikrikilla regional unit, Dadenggre Civil Sub-Division-ni SDO-na badi ka·doangaha.
Dadenggre-ni SDO-na badi ka·doanggipa chittio CRF Tikrikilla regional unit-ni parakatani gitade, songni manderang ja·manchake ia Fair Price Shop-ona re·baon uamangni merong aro gipin bosturangko ia mande on·na jechakronga, bosturangko suala matchotaha ine tol·e a·kangronga, BPL card holder-rangna kragija dake mesokronga, merongrangko sualanio bang·a somoirangon ja·manchakronga aro batanggimin jaode gimikan merongrangko man·toksrangja ine songni manderang, uamangna seachi u·iataha.
“Iandakgipa neng·nikanirangko chagrongna nangrongengani gimin songni manderang, FPS dealer baksa apsan agangrike namatna tik ka·ahachim indiba ia FPS dealer, manderangni nangnikani gita agangrikna sikjaha,” ine CRF Tikrikilla regional unit parakataha.
Indake ong·engon, ia FPS dealer-ni kragijagipa kamrangni gimin uko ra·galenba BPL nokdangrang an·tangtangan gital FPS dealer-ko seokna aro merongrangko somoi gita songni manderangna sualna on·china CRF Tikrikilla regional unit, Dadenggre-ni Civil SDO-ko didiataha.