GH-o BJP-ko wate katgipa manderangsa Cong-na pu·onna: Bernard
SHILLONG: Re·anggipa April jao ong·atanggipa Lok Sabha election-o Meghalaya a·dokni parliamentary constituency damgnion, National People’s Party (NPP)-na chakpaaniko on·china ge·etaniko on·ahaoba dakchakanirangko on·jaha ine matnanganiko Bharatiya Janata Party (BJP) jegalatskaaha.
“NPP-ko chinga cha·bokaha ong·ja maina chinga NPP-na 80,000 vote-rangko man·e on·na ku·rachake, 80,000 vote-rangkon man·e on·aha. Uamangni manderang an·tangtangan uamangna pu·onjahani giminsa NPP amako man·aha,” ine Budbar salo, BJP-ni state vice president aro Tura-ni MDC Bernard N Marak parakataha.
Tura Lok Sabha constituency-o BJP, ‘cha·bokahani’ a·selsa NPP amako man·aha aro iako Tura-ni MDC Bernard Marak an·tangan parakaha ine salsa skangsan NPP-ni dilgipa aro a·dokni Cabinet Minister Rakkam A Sangma a·kangatahachim.
Uni matnanganirangna aganchakaniko on·angskaengon, “Local news channel-o angko interview ra·aniko ua bon·e nijahakon. BJP-na tikit on·aniko NPP champengatahaon, chingkoba NPP-na chakpachina ge·etahani gimin chinga candidate-ko susaatjaha inesa anga aganahachim,” ine Marak parakataha.
“Lok Sabha election-na skang chinga a·bri aro a·kawe jolrangona wenangaha aro manderang, BJP-na pu·onna kusi ong·tokahachim. Indiba rasong gribee BJP tikitko man·jaha aro chingko NPP-na chakskachina high command-oni ge·etaha. Ia ge·etaniko on·ani ja·man Garo Hills-o bang·a dilgiparangan kusi ong·tokjaha aro doltangko wate katna a·bachengaha. BJP-na kam ka·giparangba bang·batan party-ni kosako chakate, Congress-na pu·onskaaha,” ine Marak aganaha.
NPP-ni national president aro a·dokni Chief Minister Conrad K Sangma baksa tom·ani somoion uamang NPP-na 80,000 vote-rangko man·e on·na ku·rachakaha ine janapatengon, “Lok Sabha election-o 80,000 vote-rangkode NPP man·china chinga raken kam ka·aha aro iasa chong·mot kattade. Re·anggipa chang MLA election-ode BJP-ni voter-rang sak 90,000-mangni gita dongachim indiba Lok Sabha election-o chinga rakbate kamko ka·skaahachim,” ine BJP-ni state vice president parakataha.
Lok Sabha election-o Saleng A Sangma-na chaka inako jegalatskaengon, “Anga una (Saleng)-na chaka ine aganjachim indiba ua angni dakchakaniko bi·na angona re·baaha inesa aganachim. Anga saksa BJP-ni chong·mot membor ong·e maming dakeba Congress-na pu·onna man·ja aro anga party-ko wate katgipa manderangkoba champengna man·skaja,” ine Marak talataniko on·angaha.