Niam gri chalaienggipa sawmill-rangko chipatchina APA dabia

TURA: West Garo Hills a·jani a·kawe jolrango donggipa Phulbari, Masangpani, Nimaikata, Belbari aro New Bhaitbari songrango niam gri sawmill-rangko chalaiengani a·sel Garo Hills-ni bolrangko niam gri rate ia sawmill-rangona ra·baskaenga ine A·chik Progressive Approach (APA) Phulbari western zonal parakatenba, ia sawmill-rangko ta·raken chipatchna Holaidonga-ni Assistant Conservator of Forest (ACF) in-charge-na sedoataha.
Ia sawmill-rangko ta·raken chipatchina Forest official-ko didiatengon, ia jolrango niam gri sawmill-rangko chalaiengani a·sel samtangtango ong·telaigiparangna nangchakeaniko ra·baenga aro ian buring bolgrimrangna dongimin niamrangko pe·ani gitaba ong·enga ine APA Phulbari western zonal-ni general secretary Pretington Marak parakataha.
Marak-ni parakatani gitade, ia jolrango niam gri chalaienggipa sawmill-rangara, Masangpani-o damgittam, Nimaikata-o damsa, Belbari-o damgittam aro New Bhaitbari-o dambri dongachim.
“Ia sawmill-rangko Forest department-ni permit aro licence grisa chalaitokengani gimin ian a·songni niamko pe·ani gita ong·enga. Uni gimin ia jolrango niam gri chalaienggipa sawmill-rangko ta·raken chipattokchina anga mol·molenga,” ine APA Phulbari western zonal-ni general secretary, Holaidonga-ni ACF-na sedoatgipa chittio parakataha.