TURA: Meghalaya a·dokni gitcham Chief Minister Salseng C Marak, Sukrobar salo a·gilsakko watangaha. Ua bilsi 83 ong·ahachim.
Koborko on·ani gitade, ru·uta sal somoirangonin Marak sagi, sae dongengachim aro uandaken uko sanna gita August 8 tariko, Tura-ni Holy Cross Hospital-ona ra·baahachim. Ja·mano uko nambate sanna gita August-ni 12 tariko, Tura Civil Hospital-ona apjitangskaahachim indiba ua saaoni nampilna gita man·jae, Sukrobar salo a·gilsakko watangaha.
1970 bilsionin Marak sagi, Resubelpara-ni MLA ong·e seokako man·baaha aro uandaken 1993 bilsioni 1998 bilsiona ua Meghalaya a·dokni dokgipa Chief Minister ong·e dangdike on·angaha.
2008 bilsini Assembly election-o Marak sagi, Nationalist Congress Party (NCP)-ni candidate Timothy D Shira-ni jako amako man·chengaha indiba 2013 bilsini Assembly election-ode ua an·tangni biapko chepiltaiaha.
Indake ong·genchimoba, 2018 bilsini Assembly election-o ua changstaie National People’s Party (NPP)-ni candidate Timothy D Shira-ni jakon amako man·taiaha aro uni ja·man 2023 bilsini Assembly election-ode ua be·enni gita an·senggijaniko man·na a·bachengahani gimin susajana tik ka·aha.
Uni politics-o kam ka·a gimikan ua Congress dolna kakket ong·e dongaha aro uni bon·kamgipa salrangonan ua Congress dolko watgaljaha.
2003 bilsirango ua Meghalaya Pradesh Congress Committee (MPCC)-ni president-ba ong·angaha.
Indake ong·engon, a·dokni gitcham Chief Minister Salseng C Marak-na da·al Sonibar salni bako bon·kame mande ra·pilskaaniko dakna gita dingtangmancha jinma tom·bimonganiko Resubelpara Mini Stadium-o ong·atenga aro ia tom·bimonganio, a·dokni Chief Minister Conrad K Sangma baksana dingtang dingtang dilgiparangba bak ra·anggen. Uni ja·man Marak sagini manggisiko Gajingpara gopramo mande ra·bee gopgen.
Marak-ni siangani ja·man, a·dokni Chief Minister Conrad K Sangma aro dingtang dingtang dilgiparangba kalimpaanirangko parakattokaha.
