Garo Hills-oba a·songni chang 78-gipa jakgitelani salko tom·tome manianga

TURA: India a·songni pilak biaprango gitan Garo Hills-ni dingtang dingtang biaprangoba chang 78-gipa Independence Day ba jakgitelani salko Bristibar salo, tom·tombee maniangtokaha.
Tura-o ia salko Matchakolgre LP School kal·chakramo maniangaha aro ia manianio, a·dokni Deputy Chief Minister Prestone Tynsong, a·songni nisanko songdoe on·angenba, dol 18 parade dolrang, chong·motan, Goeragre-o donggipa 2nd MLP Battalion, Tura DEF, Tura Government College-ni NCC, Don Bosco College-ni NCC, Don Bosco Higher Secondary School-ni NCC, Pechon Memorial School-ni NCC, St Marys HS School-ni Scouts & Guides, St Xaviers HS School-ni Guides aro 2nd MLP Battalion-ni Band Party-ni Rashtriya Salute-ko ra·angjolaha.
Ia manianio, West Garo Hills a·jani Deputy Commissioner Jagdish Chelani, Additional Deputy Commissioner (ADC)-rang, Assistant Commissioner-rang, Superintendent of Police Abraham T Sangma, dingtang dingtang department-ni officer-rang, dingtang dingtang skulni skigiparang, chatro chatrirang aro gipinrangba dongpae bak ra·angtokaha.
Ia tom·anio a·dokni Deputy Chief Minister Prestone Tynsong, jinmana aganprakengon, British-rangni sasononiko jakgitel ong·atna gita an·tangtangko on·kange kam ka·anggipa pagitcham ma·gitchamrangko mittelpilangaha.
A·songni jakgitelanina an·tangtangko on·kange kam ka·anggipa pagitcham ma·gitchamrang, jekai Netaji Subhas Chandra Bose, Bhagat Singh, Rajguru, Sukhdev aro Meghalaya a·dokni U Tirot Sing, U Kiang Nangbah aro Pa Togan Nengminja Sangma-koba ia salo ua gisik ra·e dingtangmancha mande ra·pilskaaniko dakangaha.
A·songni niamrangko warachakanio an·tangtangko on·kange kam ka·enggipa dingtang dingtang sipai dolrangkoba Tynsong mittelpilangaha.
Bilsi 10-ni gisepon Meghalaya a·dokkoba a·songo nambatsranggipa dam 10 a·dokrangoni damsa ong·atna gita a·dok sorkari, miksonge kam ka·enga ine janapatengon, sorkarini kamrang baksana manderangni bakrimanichi iako sorkari chu·sokgipa ong·atna man·gen ine Deputy Chief Minister parakataha.
Meghalaya a·doko tom·tomanirangko rakkina man·enga ine janapatengon, ia bilsini April jao Parliamentary election-koba a·doko tom·tome ong·atna man·aha ine Tynsong aganaha.
Assam aro Meghalaya a·dok damgnini simarango ru·uta bilsirangonin meligrikna man·jaenggipani bidingo janapatengon, Assam a·dok baksa meligrikna man·jaenggipa bangki damdok biaprangoba namgrikaniko ra·bana da·o kamrangko ka·engaha ine Deputy Chief Minister parakataha.
Ia 2024 bilsini July 1 tarik dipet ra·gatgipa minggittam criminal law, chong·motan Bharatiya Nyaya Sanhita, Bharatiya Nagarik Suraksha Sanhita aro Bharatiya Sakshya Adhiniyam-ni giminba ia tom·anio Deputy CM agan-talate on·angaha. Autonomous District Council (ADC) Court-rangde Sixth Schedule-ni on·gimin niamrangon chalaiangkugen ineba ua aganaha.
Bangladesh a·songo so·sojengjeng ong·engani gimin Meghalaya a·dokni pilak simarangon sorkari, chel·chakanirangko bariataha ineba ua aganaha.
Deputy Chief Minister-ni aganani gitade, sorkariko nambate chalaiengahani gimin, tangka paisa jakkalaniko nambate nirokengani gimin aro manderangna dangdike on·anio kamrangko nambatatahani gimin batanggimin bilsi bongani gisepo a·doko koros ong·ani gong kror 10,967-oni gong kror 27,027-ona tang·doangaha.
Gama ge·ani kamrangni bidingo janapangskaengon, Lakadong holdi, Khasi Mandarin, e·ching, me·gimu aro te·brong gama ge·anirangko Mission Mode project-o ra·gatahani a·sel game ge·e cha·enggipa manderangni man·gnirang tang·dona a·bachengaha aro ian lak 1.5 nokdangrangna namgni ong·aha ine Tynsong aganaha.
Adita salrangna skang parakatgipa CM Farm+ programni bidingo janapangengon, ia programni ning·o game ge·e cha·giparangna gamchatani batgipa gama ge·ani me·su samjak aro bolam biterangko sorkari on·anggen ine Deputy CM parakataha.
CM-ELEVATE program-ko a·bachengatanichi jila kaanirangko dake cha·enggipa sak 20,000-mangni gita subsidy baksa tangka paisani gita dakchakaniko man·a bank-rango dorgasto galaha aro sak 1100-mangni gita dairy farmer-rangko Meghalaya Milk Mission-ni ning·o dol 103 cooperative society-o napatna man·aha ineba Deputy CM aganaha.
Health ba an·seng baljokani kamrangni gimin janapangskaengon, a·dokni budget-oni 9 percent-ko an·seng baljokani kamrangna chamaha aro iani a·sel an·pakani somoirango siani 47 percent komiangaha aro bi·sa bakgitchakrangni sianiba 30 percent komiangaha ine Tynsong aganaha.
NEHU-ni ning·o bak ong·enggipa pilak college-rangon gital Education policy-ko ra·gatna man·aha aro Captain Williamson Sangma State University-ko a·dokni skanggipa State University dake a·bachengatna da·o kamrang matchotaha ineba ua aganaha.
Meghalaya Grassroots Music Project, Hello Meghalaya OTT, CM-CONNECT, Digital India Land Records Modernisation Program aro uandakgipa dingtang dingtang program-ni namgnirangkoba ia tom·anio Deputy Chief Minister agan-talate on·angaha.
Ia salko manianio, SSLC porikkao skanggipa gadangko man·e chu·sokgipa chatro Anuj Chetry, JEE, UPSC (NDA&NA) Indian Institute of Space and Technology (IIST), JEE Advanced-o chu·sokgipa Jonathon Singkam M Sangma aro jawilwat tarianio dingtang dingtang award-rangko man·gipa Dominic Megam Sangma-naba Deputy Chief Minister-ni jakchi mande ra·pilskaaniko dakangaha.
Unbaksana dingtang dingtang department-rango kam ka·enggipa manderang, chong·motan Tura DC (Election)-ni Senior Enumerator Warner Techeng K Sangma, BLO Mohan Singh, BLO Frederick Sangma Tikrikilla PHC-ni Staff Nurse Morjina T Sangma, Multi Purpose Rehabilitation Worker (Demdema Block) Abdus Sobur, Community based Rehabilitation Worker (Tura Urban) Amanda Lisa M Sangma, Community based Rehabilitation Worker (Dalu Block) Salse N Sangma, Head Assistant Dhiraj Banai, Peon Pius R Marak, Sericulture Demonstrator Wilseng B Marak, Peon Samseng M Sangma, Peon Daud W Momin, Sweeper Ratul Ch Sangma, LDA Cheizy Chintu K Marak, Peon Selbister M Sangma, Kiranbirth D Sangma, Peon Samuel A Sangma, Senior Vety Assistant Canforth N Sangma, Peon Branlow R Marak, Regular Casual Worker Salim Sangma, Regular Casual Worker Budot Ch Marak, UDA Kantseng Ch Marak, Muster Roll Babun Ch Marak, Assistant Operator Denis Megam Momin, Agri Marketing Intelligence Inspector Rodhil M Sangma, Horticulture Inspector Zakir Hussain Sarkar, Tura DCIC Steel Fabrication-ni Supervisor Repsonsing R Marak aro NRLM-MSRLS-ni DMM Michelle Ch Momin-naba ia salko manianio mande ra·pilskaaniko dakangaha.
March Past-na susaanio skanggipa boksisko Pechon Memorual HS School-ni NCC Boys, gnigipako Don Bosco HS School-ni NCC Boys aro gittamgipa boksisko Don Bosco College-ni NCC Boys cheangskaaha.
Apsan daken a·songni chang 78-gipa jakgitelani salko North Garo Hills a·jaoba Resubelpara-ni Mini Stadium-o maniangaha aro ia salko manianio, a·dokni Health & Family Welfare Minister Ampareen Lyngdoh, a·songni nisanko songdoe on·angskaaha.
Ia manianio dol 20 parade ka·gipa dolrang bak ra·angaha aro ia dolrangara, MLP Battalion, Mendipathar College-ni NCC, scouts, skulni chatro chatrirang aro Mendipathar-o donggipa St Thomas Higher Secondary School-ni Brass Band party ong·a. March past-ko DSP (HQ) John Clitzer A Sangma, skanggipa commander aro NGH-ni Inspector Ruffy Ch Sangma, gnigipa commander ong·e dilangskaaha.
Ia manianio dingtang dingtang kamrangko ka·gipa sak 25 manderangna, uamangni kamrangna mittelpilani chin gita boksisrangko on·angaha.
Nasha Mukt Bharat Abhiyan-o bak ra·gipa North Garo Hills a·jani police officer-rangnaba ia tom·anio boksisrangko on·angaha.
March past ka·susaanio Mendipathar-ni St Thomas Higher Secondary School (Boys) chegipa ong·aha.
Ia salko maniani bak gita dingtangmancha bi·sarangna robol kal·susaani aro DC XI baksa SP XI dolni gisepo robol kal·susaanikoba ong·atangaha.
South West Garo Hills a·jaoba a·songni chang 78-gipa jakgitelani salko Ampati-o aro block dambrion maniangaha.
Ia manianio, a·dokni Education Minister Rakkam A Sangma, a·songni nisanko songdoe on·angaha aro parade ka·gipa dol 23-ni Rashtriya Salute-koba ra·angaha.
Dingtang dingtang kamrangko ka·giparangna, kal·susaanio aro poraianirango teng·sugipa chadamberangnaba ia salko manianio boksisrangko aro certificate-rangko on·angaha.
Ia salko manianio skul bi·sarangni chrokani, git ring·ani, kal·susaani aro uandakgipa program-rangkoba nikna man·angaha.
Ja·mano a·dokni Education Minister Rakkam Sangma baksana SWGH a·jani Deputy Commissioner Hema Nayak, SP Vikash Kumar aro dingtang dingtang dilgiparang, Ampati Civil Hospital-ona re·angenba saenggipa manderangna cha·ani bosturangko suale on·angaha.
Indake ong·engon, a·songni chang 78-gipa jakgitelani salko South Garo Hills a·jaoba Baghmara District Sports Playground-o maniangaha aro ia salko manianio Meghalaya sorkarini Chief Adviser Lahkmen Rymbui, a·songni nisanko badale on·angenba, dol 24 parade ka·giparangni Rashtriya Salute-ko ra·angaha.
March past-ko Chokpot-ni SDPO Anthony Ch Momin dilangaha aro march pass ka·susaanio skanggipa boksisko United Baptist Secondary School man·e, gnigipa boksisko Pioneers Secondary School man·angskaaha.
Ia manianio, a·jani nambatgipa ASHA aro ASHA Facilitator-rangna aro dingtang dingtang kam ka·giparangnaba mande ra·pilskaanirangko dakangaha.
Ia salko maniani bak gita bi·sarangna kal·susaani, DC XI aro skigiparangni gisepo robol kal·susaani aro DC XI baksana SP XI-ni gisepo Cricket kal·susaanikoba ong·atangaha.
Tura-o donggipa College of Community Science (CCS)-ni gitaba a·songni chang 78-gipa jakgitelani salko maniangaha aro ia salko manianio, college-ni Dean Dr Jyoti V Vastrad, jinmana aganprakengon, a·songni jakgitelanina an·tangtangko on·kange krengdilanggipa pagitcham ma·gitchamrangko mittelpilangaha.