Shillong: Party-ni MLA, Gabriel Wahlang-ko dondipatani salsa ja·mano, Eric Kharsyntiew-ko mijalo Wahlang-ni biapo Nongstoin Block Congress Committee (NBCC)-ni adhoc ba dikdiksana president-na seokaha.
West Khasi Hills District Congress Committee (WKHDCC)-ni dingtangmancha meeting-ko ka·ao Kharsyntiew-ko dikdiksana ba adhoc dake president-na seokna chanchiaha.
Nongstoin, Mawshynrut aro Rambrai-Jyrngam ia ge·gittam block-rang gimiko party-ko bilakbatatna a·pale chanchigrikna dingtangmancha chanchirimaniko dakaha.
Meeting-ni ja·mano kobor ra·timgiparangna aganao party-ni kosako chakate kam ka·anina party-oniko Wahlang-ko bilsi dokna dondipatanichi AICC aro MPCC dolgnioniko ge·etanirangko man·e NBCC-ni dikdiksana ba adhoc dake president-na uamang seokaha ine WKHDCC president, Bormanding Nonglang aganaha.
Minggipin committee, Rambrai-Jyrngam constituency-ni gitcham MDC Bah JTS Thonggni-koba rimchaksoaniko dakaha jean party-ona re·bapilna uni skaniko janapaha.
Apsan somaio Forteenson Lyngkhoi-ko District Committee-ni gitalgipa General Secretary-na seokaha aro ua Mawshynrut Block Congress Committee-ko nirokanggen.
