SHILLONG: Re·anggipa April jao ong·atanggipa Lok Sabha election-o Congress dolko cheatna gita BJP dakchake on·a ine matnangatani ja·man, ka·dongode BJP baksa bakrimaniko watchina ine Congress dolni dilgipa aro Tura-ni MP Saleng A Sangma, National People’s Party (NPP)-ko ra·biatskaaha.
Tura parliamentary constituency-o BJP-ni dakchakani a·selsa Congress dol chena man·aha ine adita salrangna skang NPP-ni dilgipa aro a·dokni Cabinet Minister Rakkam A Sangma matnange aganahani gimin ka·dongode BJP baksa bakrimaniko watchina ine Saleng, NPP-ko ra·biatskaaha.
Saleng-ni aganani gitade, Lok Sabha election-o BJP susagija NPP-na chakskachina ge·etaniko on·ahani gimin Garo Hills-o bang·a dilgiparangan suk ong·jae Congress-na pu·ontokaha ine BJP-ni state vice president aro Tura-ni MDC Bernard N Marak-ni agangipa kattarangara kakketan ong·achim.
“BJP aro Congress dolrangara wa·al aro chi gitasa ong·a aro ia dolgnini gisepo maming dakeba nangrime kamko ka·na man·jawa. Tura Lok Sabha seat-ko Congress cheani ja·man NPP-ni dilgiparang chanchinan changjaha,” ine Tura MP aganaha.
Lok Sabha election-o susana re·baon ua NPP aro BJP dolni dilgiparangko man·chape dingtang dingtang dilgiparangni dakchakanirangko am·aha ineba Saleng parakataha.
“Ia dilgiparang party-ni gita ong·ja indiba an·tangtangni gitasa angna dakchakanirangko on·aha,” ine ua talataniko on·angaha.
Uni kosako matnange roana bate, BJP baksa bakrimaniko pe·galenba an·tangtangni ka·donganiko mesokchina ineba Saleng, NPP-ni dilgiparangko ra·biataha.
Da·o dipet Meghalaya a·doko BJP-ni MLA sakgni donga aro uamangara AL Hek baksana Sanbor Shullai ong·achim. AL Hek-de Cabinet Minister-ba ong·engachim.
Ia chang Lok Sabha election-o Congress dolna BJP-ni chakpaaniko on·aniara India a·songni politics-o skanggipa changna Congress aro BJP-ni bakrime kam ka·aniko mesokani ong·aha ine adita salrangna skangsan NPP-ni dilgipa Rakkam Sangma matnange aganahachim.
“Congress dolna BJP kamrangko dakchake on·gen ine chinga maming dakeba chanchisoanirang dongjachim indiba da·o iako BJP-ni dilgipa Bernard Marak an·tangan parake on·aha. Election-o BJP-ni Congress dolko cheatna gita kam ka·ani ian itihaso skanggipa ong·gen,” ine Rakkam aganahachim.
Tura parliamentary constituency-o BJP-na sak 70,000-oni 80,000-mangni gita voter-rang donga ine janapatengon, a·bachengonin ua Lok Sabha election-o BJP-ni dilgiparangko Congress-na campaign ka·ako nikahachim ine Rakkam matnangatahachim.
