TURA: West Garo Hills a·jani a·kawe jolrango niam gri saw mill-rangko chalaienga ine dingtang dingtang dolrangni badi ka·ani ja·man re·anggipa Sukrobar salo, Garo Hills Autonomous District Council (GHADC)-ni ning·o donggipa Forest department-ni official-rang, Masangpani aro Nimaikata songrango niam gri chalaienggipa saw mill-rangko chipattokaha.
Ia saw mill-rangko chadrapeanio Forest official-rang, saw mill-o jakkalenggipa ma·manti ostrorangkoba rim·aha.
“Ia jolrango niam gri saw mill-rangko chalaienga ine badi ka·anirangko man·soani ja·man chinga ia songrangona re·ange nion, ia saw mill-rangko maming lekka aro licence grisa chalaienga ine nikna man·aha. Chinga buring bolgrimrangko ripinge rakkina kamrangko ka·enga aro iandake buring bolgrimrango donggipa bol wa·arangko nisie galaniko nie dongchajawa,” ine GHADC-ni Range Forest Officer parakataha.
Songo noko iandake niam gri sawmill chalaianiko ba niam gri bol badingsrukanirangko nikgenchimode ta·raken kobor on·china gitaba Forest official-rang, songni nokni manderangko didiataha.
Ia sawmill-rangko chalaienggipa manderangni kosako rakgipa ja·kurangko de·gen ineba Range Forest Officer parakataha.
West Garo Hills a·jani a·kawe jolrango donggipa Phulbari, Masangpani, Nimaikata, Belbari aro New Bhaitbari songrango niam gri sawmill-rangko chalaiengani a·sel Garo Hills-ni bolrangko niam gri rate ia sawmill-rangona ra·baskaenga ine adita salrangna skangsan, A·chik Progressive Approach (APA) Phulbari western zonal parakatenba, ia sawmill-rangko ta·raken chipatchna Holaidonga-ni Assistant Conservator of Forest (ACF) in-charge-na sedoatahachim.
Ia sawmill-rangko ta·raken chipatchina Forest official-ko didiatengon, ia jolrango niam gri sawmill-rangko chalaiengani a·sel samtangtango ong·telaigiparangna nangchakeaniko ra·baenga aro ian buring bolgrimrangna dongimin niamrangko pe·ani gitaba ong·enga ine APA Phulbari western zonal-ni general secretary Pretington Marak parakataha.
