SHILLONG: Party-ni MLA-rangko aro dingtang dingtang dilgiparangko rime katrongengani gimin National People’s Party (NPP)-ni kosako ainni gita ja·kurangko de·na Congress manchiaha.
Robibar salo, Meghalaya Pradesh Congress Committee (MPCC)-ni president Vincent H Pala-ni parakatani gitade, BJP gitan da·o NPP-ba Meghalaya a·doko gipin political dolrangni dilgiparangko rime katenba, gipin political dolrangko be·gruatna jotton ka·enga.
“Maharashtra aro Himachal Pradesh a·dokrango iakon BJP dakenga aro da·o NPP-ba apsan daken Meghalaya a·doko gipin political dolni dilgiparangko rime katenba gipin political dolrangko be·gruatna jotton ka·enga. Manderang da·o NPP-ko jegaltokengahani giminsa uamang gipin dolrangko be·gruatna jotton ka·enga. NPP aro BJP dolgnian, an·tangtangni niam gri man·gipa tangkarangchi manderangko brena jotton ka·enga,” ine Pala aganaha.
NPP-ni kosako ainni gita ja·kurangko de·ani bidingo AICC-ni legal team baksa chanchirimna ua bakan New Delhi-ona re·angenga ine janapatengon, a·dokni manderangko NPP sinjetaha aro an·tangtangna tangka paisarangko chimongtokaha ine MPCC-ni president matnangataha.
“NPP-ko jakgitele jokna chinga on·jawa aro uamangkoba biap damsaoni damsaona katjojoatgen,” ine Pala aganaha.
Congress dolni MLA sakgni NPP-o napna miksongenga ine koborrangko man·soenba ia MLA sakgniko party-o membor ong·aoniko dontongatani ja·man Pala, ia kattarangko aganaha.
MLA sakgniko suspend ka·na gita AICC headquarter-onisa ge·etaniko on·ataha ine talataniko on·angengon, ia MLA sakgniko ra·galanichi Congress dolna maming bilgrianirang dongjawa aro District Council-rango NPP baksa apsan kam ka·rimengani giminsa badiaba badiaba constituency-rango Congress dolni gadang tang·onangaha ine MPCC-ni president parakataha.
“Congress dolna kam ka·giparang kusi ong·tokenga aro ian Congress dolo kam ka·ani bewalrangko rongtalatani gitasa ong·enga maina District Council-o NPP baksa kamrangko ka·rimengani a·selan jegalanirangko man·tokengachim. Ia MLA sakgnian NPP-ko matnangade matnangtokgen indiba KHADC-ode NPP baksaan kamko ka·rimenga,” ine Pala aganaha.
 |
ReplyForward
|
