SHILLONG: Group B, C aro D gadangni kamrangna ra·anio personal interview ra·aniko bon·atchina gita dabie, Khun Hynniewtrep National Awakening Movement (KHNAM) dolni gita Sombar saloni a·bachenge, Shillong songjinmani Malki robol kal·chakramo asonge jingjengataniko a·bachengataha.
Ia jingjengataniko KHNAM dolni membor-rang, Sombar pring 10:00 bajioni attam 5:00 bajiona ong·atangaha.
Ma·mong sorkari aro a·songni gipin dam 23 a·dokrango gitan Meghalaya a·dokoba sorkarini Group B, C aro D gadangni kamrangna seokanio personal interview ra·aniko bon·atchina dabie, ia jingjengataniko KHNAM ong·atenga.
Ia jingjengataniko ong·atani bidingo kobor ra·timgiparangna talate on·angengon, Group B, C aro D gadangni kamrangna seokanio, personal interview ra·aniko bon·atchina gita uamang bilsisa skangonin dabiengahachim indiba da·alonan ia dabianiko sorkari chu·sokatchipkujaengani gimin jegalaniko mesokna gita ia jingjengataniko dakenga ine KHNAM-ni working president Thomas Passah parakataha.
Sorkarini dingtang dingtang department-rango bangbang ong·e dongenggipa kamrangko gapatanio, kamrangko man·na kragipa candidate-rang man·china gita personal interview-ko ra·gija written examination ba porikka seaniosa pangchakna nanga ineba ua aganaha.
“Ma·mong sorkari, Group B, C aro D gadangni kamrangna personal interview ra·aniko 2016 bilsion bon·ataha aro a·songni gipin dam 23 a·dokrangba ia apsan niamkon ra·gataha,” ine ua aganaha.
Ia kamrangna manderangko seokanio dongnuani gri ong·na gitasa iandakgipa niamko ma·mong sorkari ra·gataha aro Meghalaya sorkariba ia apsan niamko ja·rikna nanga ineba ua aganaha.
Sorkarini ia kamrangna manderangko seokanio personal interview ra·aniko bon·atgenchimode, dongnue dakani aro mikkang niteani dongjawachim ineba ua aganaha.
Sorkarini kamna seokanio personal interview-ko bon·atchina dabie KHNAM jingjengata
Date:
Share post:
