RESUBELPARA: Assam a·dokni Damra-oni Meghalaya a·dokni Bajengdoba-ona taribaenggipa ramako da·o matchotangengahani gimin ia rama gita songre songgabatanio ata kontamangni gitade ta·rakbate sokna man·engaha aro ian North Garo Hills a·jani manderangnasan ong·aigija rama gita songre songgabatenggipa pilak manderangnan rang·speaniko ra·baani gita ong·engaha.
Ia ramani badiaba badiaba dolongrangna agrede da·o ramarang chu·gimikan matchotna siengaha aro ia rama gita songre songgabatenggipa manderang da·o ta·rakbate sokna man·engaha.
Ia ramako Badri Rai & Company (BRC) tariengachim aro ia km 36 ong·gipa ramako tarianio gong kror 78-na baten koros ong·aha.
“Skangode ia rama gimikon a·kolrara dake songre songgabatanio namen neng·beani ong·achim aro Damra-oni Bajengdoba-onan kontasa atamangde nangaiachim. Ia ramako da·o matchotangengahani gimin chinga da·ode minute 45 ba minute 50-mangon sokna man·engaha. Chinga ka·donga ia rama adita bilsirangnade name donggen,” ine North Garo Hills a·jani mande saksa MG Momin aganaha.
Ia Damra-Bajengdoba ramako 2020 bilsio tarina a·bachengahachim aro ramako tarina a·bachengon dingtang dingtang neng·nikanirangko chagrongna nangahachim.
“Khasi aro Jaintia Hills-o gitade Garo Hills-o rama tariani bosturang, jekai an·cheng, ro·ong aro uandakgipa bosturangko chu·onga gita man·jani gimin ia kamko ka·anio bosturangko breanio namen neng·beani kam ong·achim. Skanggipa bilsisa atamangnade chinga ia neng·nikaniko chagrongna nangaha indiba ja·manosa chinga quarry-ko bikote, an·cheng aro ro·ongrangko altubate man·na a·bachengaha,” ine ia ramako tarigipa company-ni official-rang parakataha.
Iandake ramako tarianio neng·nikanirangko chagrongna nangahani a·sel ja·manchakatako man·na nangaha aro iani gimin dingtang dingtang dolrang ia company-ko matnangtokahachim.
“Chingni neng·nikanirangko namatna a·bachengahaon chinga ka·sinsin kamrangko name ka·na man·aha aro da·o ramarang bewalkon matchotaha. Ia rama ru·ute baigen aro manderangna chu·ongnikaniko on·gen ine chinga ka·dongenga. Kamrang chu·gimik matchotahaon chinga ia ramako sorkarina pakwate on·anggnok,” ine ramako tarigipa company-ni official-rang parakataha.
