TURA: Tura-ko Winter ba Second Capital songani bidingo dingtang dingtang dolrang baksa agangrikna re·anggipa bilsion a·dokni Chief Minister Conrad K Sangma ku·rachakaniko on·angahachim ine A·chik Conscious Holistically Integrated Krima (ACHIK) gisik ra·atpiltaianiko on·angenba, iani bidingo Garo Hills-ni dingtang dingtang dolrang baksa agangrikaniko ta·raken a·bachengatchina Chief Minister-ko didiataha.
ACHIK Krima Council-ni general secretary Happynews R Marak-ni parakatani gitade, re·anggipa bilsio ACHIK dolni membor-rang, Tura-ko Winter Capital songchina dabie sal 14-na kingking okumu chake jingjengatangahachim aro ua somoion a·dokni Chief Minister, ACHIK aro dingtang dingtang dolni dilgiparangko grongenba, Tura-ko Winter Capital songani bidingo bakan agangrikgen ine ku·rachakaniko on·angahachim.
“Tura-ni Mini Secretariat-o dingtang dingtang dolrang baksa tom·e chanchirimani somoio, Tura-ko Winter Capital songani bidingo agangrikgen ine ku·rachakaniko on·angahaoba da·alonan maming kamrangko a·bachengatkujaenga. Uni gimin Garo Hills-o songdongenggipa manderangni namgnina Tura-ko Winter Capital songchina dabianiko chu·sokgipa ong·atna ACHIK baksa agangrikaniko ta·raken a·bachengatchina chinga nang·ko mol·molenga,” ine Marak, Chief Minister-na sedoatgipa chittio janapataha.
Tura-ko Winter Capital songchina dabianiara ru·uta bilsirangonin Garo Hills-o songdongenggipa manderangni dabiani ong·enga ine janapatskaengon, Tura-ko Winter Capital songgenchimode ian sorkarini kamrangko namdapatanisan ong·aigija Garo Hills gimikon apsan ong·e namroro silroroaniko ra·bana man·gen ine ACHIK Krima Council-ni general secretary parakataha.