SHILLONG: Congress dolni MLA sakgittam re·badapani ja·man da·o National People’s Party (NPP)-o MLA-rang sak 31 gapahaoba, gipin dolrang baksa nangrime chalaienggipa Meghalaya Democratic Alliance (MDA) 2.0 sorkariko term matchoten rikangkugen ine Budbar salo, NPP-ni state president aro a·dokni Deputy Chief Minister Prestone Tynsong parakataha.
“Chinga da·o nanga gita MLA-rang dongahaoba MDA 2.0 sorkarini bimingo term matchoten rikangkuna nangnikenga,” ine Tynsong, kobor ra·timgiparangna aganaha.
Cabinet-ko gital dake sualpiltaina miksonganirang dongama ine sing·anina aganchakaniko on·angengon, ua an·tangde NPP-ni state president ong·e Cabinet-ko sualpiltaiani giminde maming kobor dongkuja ine Tynsong aganaha.
Sako minister songna nanga aro sana badia portfolio-ko on·na nanga ukode chief minister-sa ma·siani gimin ia sing·anikode chief minister-osa sing·na nanga ineba ua aganaha.
“Sakoba Cabinet-oniko ra·galna nanggenchimode ian Chief Minister-ni kamsa ong·aigen indiba NPP-ni gitade ong·jawa,” ine NPP-ni state president aganaha.
Congress dolni MLA sakgittam napangani ja·man sak 60 membor donggipa Meghalaya Assembly-o da·o NPP-ni MLA-rang sak 31-ona tang·doangahachim.
Kobor on·timgiparangni u·iatani gitade, da·o dipet a·dokni Chief Minister Conrad K Sangma-ba MDA-o bakrimenggipa dingtang dingtang dolrangko ra·galna miksonganirang dongkujachim.
Congress dolni MLA sakgittam, NPP-o napahaoba da·o dipet a·dokni Cabinet-ko gital dake sualpiltaikujawa ine salsa skangsan a·dokni Chief Minister Conrad K Sangma parakatahachim.
“Da·o dipet chinga Cabinet-ko sualpiltaikujawa aro da·o ong·enga gitan ong·angkuaigen aro kamrangko apsan daken chinga meli-nangrime ka·angkuaigen,” ine Sangma aganahachim.
