TURA: South Garo Hills a·jaoba dontonggija mikkarang waenganichi a·arang be·engani gimin aro ramarango bijoli line-rang chottome manderangna kenchakna nanganirangko on·engani gimin mikkarang namkalkujaskal, a·jani pilak skulrangkon chutti watchengchina gita South Garo Hills a·jani social activist Greneth M Sangma, a·dok sorkariko didiataha.
Iani bidingo Baghmara-ni Sub-Divisional School Education Officer (SDSEO)-na seachi mol·molatengon, South Garo Hills a·ja gimikon dontonggija mikkarang waengani a·sel bang·a biaprangon a·a ruronganirangko aro bijoli line-rangni chottomanirangko nikna man·enga aro ian skulrangchi re·enggipa bi·sarangna kenchakna nangani ong·enga ine Sangma parakatenba, obostarang namkalkujaskal a·jani pilak skulrangkon chutti watchengchina didiataha.
“Uni gimin mikkarang namkalkujaskal aro manderang re·rurana gita ramarang naljokkujaskal South Garo Hills a·jao donggipa pilak skulrangkon chutti watchina anga mol·molenga. Mikkarang dontonggija waengani gimin obostako nirok sandina man·na gita Distroct Disaster Management Officer-na u·iataniko on·china aro mikkarang bilongbate wana skangan skulrangko chutti watchina gitaba anga mol·molenga,” ine Sangma, Baghmara-ni SDSEO-na sedoatgipa chittio janapataha.