BAGHMARA: South Garo Hills a·jani Experiential Learning Centre-ko Budbar salo, a·dokni Education Minister Rakkam A Sangma do·ga oe on·angaha aro ia centre-ko do·ga oe on·anganio, Baghmara-ni MLA KR Marak, South Garo Hills a·jani Deputy Commissioner R Yanthan aro dingtang dingtang officer-rangba dongpae bak ra·angaha.
Ia Experiential Learning Centre-ko do·ga on·angani somoio a·dokni Education Minister, jinmana aganprakengon, skie ra·anide atchiaoni siaona kingkingan ong·aia ine skie ra·ani gamchataniko talate on·angaha. Mikkangchi mande ong·na sikgenchimode skie ra·na aro knatimna gisiko nangna nanga ineba ua aganaha.
Ia gital chasongara technology-ni chasongsa ong·ani gimin social media ba uandakgipa pilak kolrangonikon skie ra·china gitaba Education Minister, chatro chatrirangko didiangaha.
Ia Experiential Learning Centre-ko South Garo Hills a·jani gitcham Deputy Commissioner S Awasthi-ni dilanichi Baghmara-o kulina gita man·aha aro iana India sorkarini Information & Broadcasting Ministry, tangka paisarangko dakchake on·aha.
Ia Learning Centre-o Digital Lab, Computer Lab aro Gaming Zone dongani gimin chatro chatrirang, dingtang dingtang cholrangchi skie ra·na man·gen.
Digital Lab-o Class KG-oni class XII-ona MBOSE-ni ra·gatgipa NCERT-ni syllabus-ko donaha aro ia Lab-o ge 20 Tablet-rangko donaha.
Gaming Zone-oba Motor Car racing, bike racing, VR machine aro robol kal·aniko donahani gimin chatro chatrirang iano skie ra·joljol game-rangkoba kal·na cholko man·gen.
Ia Experiential Learning Centre-ko Society for Empowerment & Development of Youth, jako ra·e chalaiangskagen.
