SGH-ni ramarangko ta·raken tarichina dabie jinma re·jomaniko ong·ata

BAGHMARA: South Garo Hills a·jani National Highway (NH-62) ba NH-217 ramako ta·raken tarichina aro ia ramako tarina man·kujaengmiting somoirango namjabatgipa ramarangko tarisoskachina gita dabie Sukrobar salo, South Garo Hills a·jani dingtang dingtang NGO-rang, jekai GSU, FKJGP, ADE, AYWO, AHAM, APA, AOSW, GSMC, NGCO, ASPF aro uandakgipa dolrang, a·ja songdongenggipa manderang baksa jinma tom·e re·jomaniko ong·atangaha.
Iana skangba South Garo Hills a·jani dingtang dingtang dolrang, dingtang dingtang ramarangko tarichina dabie, Karukol aro Gasuapara-oba apsan daken jinma tom·e re·jomanirangko ong·atangaha aro uandaken Sukrobar salo, South Garo Hills a·jani headquarter-oba jinma re·jomaniko ong·atangaha.
Jinma re·jomaniko ong·atna skangba re·anggipa antionin a·bachenge NGO-rang, Baghmara-o donggipa PWD NH office-ko picketing ka·e jingjengatangahachim.
Ramarangko tarichina sal 20 somoi on·ahaoba ia sal 20-ni gisepo, ramarangko tarina a·bachengjahani gimin NGO-rang, a·jao songdongenggipa manderang baksa jinma jegale, re·jomaniko ong·atangskaaha.
Dingtang dingtang dolrangni parakatani gitade, ia NH-62 ba NH-217 ramako ru·uta bilsirangna skangonin uamang tarichina dabiengachim indiba da·alonan ia ramako tarichipjahani a·sel da·o gita wachini somoirangode manderang re·ruraanirango namen neng·nikanirangko man·tokengachim.
Ia ramarang gimikon a·kolrara dakahani a·sel ian songre songgabatenggipa manderangna kenchakna nanganiba ong·enga ine dingtang dingtang NGO-ni dilgiparang parakataha.
“Ia NH-62 ramani bidingo chinga 2019 bilsio a·dokni Chief Minister Conrad Sangma-ko gronge agangrikon, ia ramako NH-217 dake tariskagnok aro ramako 2020 bilsionin 2 lane rama dake tarina a·bachengatgnok ine chingna aganataha. Chief Minister-ko chingni grongaoni da·o bilsibri batangpilengaha indiba da·alonan maming ja·ku de·anirangko nikna man·kujaenga,” ine South Garo Hills a·jani NGO-rang parakataha.
South Garo Hills a·jani MLA sakgittaman sorkarini bako ong·engoba da·onan ia dilgiparang maming ja·kurangko de·diljaenga ineba NGO-rang matnangataha.
NGO-rangni parakatani gitade, ia ramako tarina gita PWD department-ba ku·rachake, ia bilsini June jao on·gipa work order-koba mesokahachim indiba ia km 100-na batgipa ramarangko tarina gong kror 2 tangkarangkosan chamaiahani gimin ian ramani mitam bakmangmangkoba tarina chu·ongjawachim.
“Ia ramarang namjani a·selan Tura-oni Baghmara-ona songrena gita komibeoba konta 6 somoiko nangenga aro badiaba bakrangode garioni ong·oneba re·na nangenga. Meghalaya a·doko South Garo Hills a·jaba gitchambatsranggipa a·jarangoni damsa ong·achim indiba da·alona kingkingan South Garo Hills a·jani manderang, iandakgipa neng·nikanirangko chagrongna nangtokkuenga,” ine NGO-rang parakataha.
Indake ong·engon, ia ramako tarina gita uamang sal 20 somoiko district administration-na on·angtaiaha aro ia sal 20-ni gisepo maming ja·kurangko de·jagenchimode rakbate jingjengatanirangko dakangskagnok ine South Garo Hills a·jani NGO-rang parakataha.