SHILLONG: Meghalaya a·doko Congress dolko chu·gimik bon·atsrangna gita National People’s Party (NPP)-ko jakkalenga ine matnanganiko Meghalaya a·dokni Bharatiya Janata Party (BJP) jegalataha.
Congress dolni MLA sakgittamko NPP-ona rimangani ja·man, a·songni gipin a·dokrango BJP-ni kam gitan Meghalaya a·dokoba Congress dolko chu·gimik bon·atsrangna gita NPP-ko jakkalenga ine adita salrangna skangsan Meghalaya Pradesh Congress Committee-ni president Vincent Pala matnange aganahachim.
Iandake matnanganiko jegalatskaengon, a·doko Congress dolko bon·atna gita BJP, NPP-ko jakkalenga ine chanchianiara gokani kamsa ong·aia ine BJP Meghalaya-ni ku·wattimgipa M Kharkrang parakatskaaha.
“Congress dolni MLA-rangko ong·katchina chinga nangnikenga ong·ode uamangko BJP-osa napatgenchim aro NPP-ode napatjawachim,” ine Kharkrang aganenba, BJP aro NPP dolgnian dingtang dingtang dolrangsa ong·ani gimin iandakgipa kamrango maming nangrimani dongja ine talataniko on·angaha.
MPCC president-ni matnange agangipa kattarangko jegalatengon, da·o adita jarangni gisepo ong·atna sienggipa Gambegre by-election-o Meghalaya a·dokni BJP-ba susana nangnikenga ine Kharkrang parakataha.
Batanggimin chang ong·atanggipa Lok Sabha election-o ma·mongni BJP-ko dilgiparang, Meghalaya a·dokni Lok Sabha seat damgnion susagija NPP-na chakskana tik ka·ahachim.
“Indake ong·genchimoba ia changode chinga Gambegre by-election-o susana nangnikenga ine ma·mongni dilgiparangna u·iatmanaha aro by-election-o susana gita candidate-ko seokani bidingo ma·mongo BJP-ko dilenggiparangni u·iatanina sengengkua,” ine BJP-ni state spokesperson aganaha.
