TURA: North Garo Hills a·jao Bajengdoba-oni Borjhora-ona dakanggipa rama namsrangjahani a·sel songre songgabatenggipa manderang neng·nikanirangko chagrongna nangtokenga ine A·chik State People’s Forum (ASPF) parakatenba, ia ramako ta·raken taripile on·china gita a·dokni Chief Minister Conrad K Sangma-ko didiataha.
Iani bidingo a·dokni Chief Minister-na seachi u·iatengon, Bajengdoba-oni Borjhora-ona dakanggipa rama namroroangjaengahani a·sel jolo songdongenggipa manderangsan ong·aigija ramako re·ruraenggipa pilak manderangan neng·nikanirangko chagrongna nangtokenga aro ia ramani pilak bakrangon a·kolrara dakahani a·sel minute 40 nangaigipa ramako da·o kontagni songrena nangskaengaha ine ASPF-ni general secretary Bernitha Marak parakataha.
“Bajengdoba-oni Borjhora-ona dakanggipa ramara ia jolrango chonchongipa bading chiwalanirangko dake cha·enggipa manderangna aro dingtang dingtang kamrangko ka·e cha·enggipa manderangnaba namen mongsonggipa rama ong·achim aro ia biapara Assembly-o sorkariko chalaienggipa dolo membor ong·enggipani biaprangan ong·achim,” ine ASPF-ni general secretary parakataha.
Ia ramara Bajengdoba NH-51 ramaoni Borjhora gita Rongsai AMPT ramaona dakanggipa rama ong·e Garo Hills-o songdongenggipa manderangna mongsonggipa rama ong·engachim ine janapatengon, ia ramakon bading chiwale cha·enggipa manderang aro game ge·e cha·enggipa manderang, dingtang dingtang kamrangna jakkaltokpaengachim ine ASPF-ni general secretary parakataha.
“Da·o ia ramarango a·kolrara dakahani a·sel songre songgabatenggipa aro dingtang dingtang nanga kamrangna re·ruraenggipa manderang neng·nikanirangko chagrongna nangtokengaha. Ia ramako namdapate on·genchimode ian Garo Hills-o bading chiwalaniko tang·doatna dakchakanisan ong·aigija a·dokni a·kawe jolrangona re·rurana gita gipin a·dokrangko nappakna nangjawachim,” ine Marak parakatenba, ia ramako ta·raken taripile on·china Chief Minister-ko didiataha.
