SHILLONG: Khasi Hills Autonomous District Council (KHADC) aro Jaintia Hills Autonomous District Council (JHADC)-ni dam 29 constituency-rangko gital dake sualpiltaianio, ia district council damgnini pass ka·gimin amendment rules-ko sorkari ra·chakgenma jegalgen a·dok sorkari tik ka·na nangenga ine Sombar salo, Trinamool Congress (TMC)-ni state president Charles Pyngrope parakataha.
“Sixth Schedule-ni dongimin niamo ia district council damgnini term-ko ra·dodapna gita niamrang dongjani gimin KHADC aro JHADC-ni election-ko gital dake sualtaigimin constituency-rango pangchake ba gitcham constituency-rango pangchakeba sorkari election-ko ong·atelna nangenga,” ine ua aganaha.
KHADC aro JHADC-ni taridapgimin niamrangko sorkari ra·chakaha ong·ode election-ko ta·raken ong·atna nanga ineba Pyngrope aganaha.
District council-ni election-ko ong·atna gita District Council Affairs (DCA) department, kamrangko a·bachengna nangengahani gimin sorkari pa·sike dongchana man·jawaha ineba ua aganaha.
KHADC aro JHADC-ni term-ko sorkarini jadokna ra·dodapaniara niam gita ong·aiama ine sing·anina aganchakaniko on·angskaengon, indinaride district council election-ko bilsibongaprakon ong·atna nangaiachim ine TMC-ni state president parakataha.
Pyngrope-ni aganani gitade, niam bidiko pangchake, term matchotahaon district council-ni election-ko ong·attelnan nangaiachim.
“Indake ong·genchimoba, KHADC aro JHADC-ni constituency-rangko gital dake sualpiltaina bi·aniko sorkari ra·chakaha aro district council damgnini term-ko badita jana ra·dodapa uade sorkarini jakosa ong·aiaha,” ine TMC-ni state president aganaha.