SHILLONG: An·tangna dongimin term ba somoi bon·na skangan kamtangko watnaba gnang ine chanchichipanirang ong·katengon, iandake manderangni chanchipaniko Meghalaya a·dokni Rajya Sabha MP WR Kharlukhi jegalatenba, ua dongimin somoi matchotkujaskal kamtangko watjawa ine parakatskaaha. Indake ong·genchimoba ua da·o gnigipa changnade Rajya Sabha-ni membor ong·na nangnikskajaengaha ine Kharlukhi parakataha.
“2026 bilsio angni Rajya Sabha MP ong·ani matchotahaon anga gnigipa changnade MP ong·na nangnikskajaengaha,” ine ua aganaha.
Iandakgipa koborrangara chanchichipe agananirangsan ong·aia ine janapatengon, ua an·tangan Rajya Sabha-ni membor ong·na ku·rachake ra·aha indide maini gimin ua term matchotgija kamtangko watgen ine Kharlukhi sing·doataha.
An·tangna dongimin somoi bon·na skangan Rajya Sabha MP WR Kharlukhi kamtangko watnaba gnang aro uni biapo sakgipin membor-ko Rajya Sabha-ona watatna gita Meghalaya a·dokni NPP sandienga ine adita salrangna skangsan koborrang nakatahachim.
Rajya Sabha-ni MP WR Kharlukhi, dongimin term-na skang kamtangko watgenchimode, uni biapo Tura-ni gitcham MP Agatha K Sangma-ko NPP-ni dilgiparang watatskana miksongenga ineba koborko man·ahachim.
Kharlukhi-ni bilsidokna Rajya Sabha-ni membor ong·ani re·baenggipa 2026 bilsio bon·engachim.