SHILLONG: Gipin dolni dilgiparangko ‘rime katna changa’ ine Mongolbar salo, Voice of the People’s Party (VPP)-ni dilgipa Ardent Basaiawmoit, matnangani baksa a·dokni Chief Minister aro National People’s Party (NPP)-ni national president Conrad K Sangma aro uni dolko ‘mittelpilangaha’.
“Sakgittam MLA-rangko nalsaoni nalsaona rime katna man·anichi an·tangtangni rime katna changaniko mesokahani gimin anga chief minister aro NPP-ni pilak dilgiparangnan an·tangni namgipa skaniko on·na ska,” ine Basaiawmoit, Assembly-ni Autumn Session-o aganaha.
Adita salrangna skangsan, Congress dolni MLA sakgittam, chong·motan Umsning-ni MLA Dr Celestine Lyngdoh, Mawhati-ni MLA Charles Marngar aro Nongstoin-ni MLA Gabriel Wahlang, NPP-o napangahachim ine nikna man·a.
2023 bilsini Assembly election-ni ja·man Congress dolo sakbonga MLA-rang dongkuengachim indiba Gambegre-ni MLA Saleng A Sangma, Tura-ni gital MP-na seokako man·ani ja·man aro da·o MLA sakgittamba NPP-o napangskaahani gimin Congress dolo Opposition dolni dilgipa Ronnie V Lyngdoh saksaksan dongaiaha.
