SHILLONG: Meghalaya a·dokni State Reservation Policy (SRP)-ko gital dake nipiltaianichi kamrangko tikate on·na man·gen ine mitam dilgiparang, chadamberangko dilsretna jotton ka·enga ine Mongolbar salo, Amlarem-ni UDP MLA Lahkmen Rymbui, an·tangni suk ong·gijaniko parakataha.
Mongolbar salo, Assembly-ni Autumn Session-o a·dokni chadamberangna kamrangko tikate on·na man·jaengani gimin an·tangni suk ong·gijaniko janapatengon, Scheduled Tribe-ni ning·o bilgribatgipa dolrangko dingtang gadango ra·gatna bill ra·baaniko Assembly jegalataha ine Rymbui aganaha.
Iandake ST-ni ning·on bilgribatgipa dolrangna dingtang gadangko on·aniara Hynniewtrep jat aro a·dok gimikni jatrangkon bak dakna jotton ka·anisa ong·engani gimin ian namen kenna nanggipa ja·ku de·anisa ong·a ineba UDP MLA parakataha.
“Anga War manderangna reservation-ko dabinaba gnang indiba Maram aro Lyngngam jatrangnaba dingtang dilgiparang reservation-ko dabiskaaigen aro Garo Hills-oba Atong aro Megam dolrangna dingtang reservation-ko dabigiparang dongskagen. Uni gimin ian bon·changjawa,” ine Rymbui talataniko on·angaha.
Chadamberangna iandake tol·gipa ka·donganiko on·ani pal, sakgipinrang baksa susagrikna skani gisikrangkosa on·na nanga ineba ua aganaha.
Meghalaya a·doko chadamberangna kamrangko tikate on·na man·gijaniara bretna sienggipa boma gitasa ong·enga aro iako ta·raken namatna nangenga ineba Amlarem-ni UDP MLA aganaha.
Songsalo kam man·na neng·aniko sorkari baksana a·doko songdongenggipa manderangba apsan nangrime warachakna nangenga ineba ua aganaha.
Rymbui-ni parakatani gitade, India a·songo Meghalaya a·dokba kamrangko tikate on·na man·jaenggipa a·dokrangoni damsa ong·enga ine adita salrangna skangsan official-rangni hisapanio parakahachim.
Sorkari kamrangosa pangchakgiparang batroroenga ine an·tangni suk ong·gijaniko parakatengon, bilsiprako baditaba ritcha kamrangkosan ong·katatna man·engani gimin sorkarini kammangmangosan pangchake dongna man·jawaha ine Rymbui aganaha.
Sorkarini kamrangkode ‘dal·dalgipa’ manderang baksa bak ong·gipa manderangnasan donenga ine mitam chadamberangni gisepo ma·sisretanirang ong·enga ine janapatskaengon, “An·chingan sorkari ong·e ia ma·sisretaniko talate on·na nangenga. Adita salrangna skang health, education aro police department-ni gita kamrangna ra·anio bang·a chadamberangan chu·ongnikaniko man·ahani gimin anga an·tangde kusi ong·a,” ine Rymbui aganaha.
Chadamberangni ma·sisretaniko chel·atna gita Grade IV-ni kamna personal interview ra·aniko bon·atchina gitaba UDP MLA, a·dok sorkariko didiangaha.
