TURA: A·chikrangoni skanggipa political dilgipa Pa Sonaram R Sangma-ni chang 108-gipa siani salko August-ni 27 tarik Mongolbar salo, Sonaram Memorial Trust Society aro Garo Students Union (GSU) Assam State Zone (ASZ) nangrimemba, Assam Goalpara a·jani ning·o donggipa Bakrapur songo maniangaha.
Pa Sonaram Sangma-ni siani salko pangna bilsian Sonaram Memorial Trust Society, GSU ASZ baksa nangrimenba, Bakrapur songo manidilrongenga aro uandaken ia changoba uni siani salko dingtangmancha program-ko ong·atenba apsan biapon maniangtaiaha.
Pa Sonaram R Sangma A·chikrangni gisepo skanggipa politics-ni kamko ka·dilchenggipa aro an·chi pari nika gri British sorkarini kosako dakgrikdilchenggipa ong·achim. Ua da·ororoni manderang gita skia man·begipa mande ong·pajaoba namen ka·donggipa aro an·tangni bebera·anio mogija kim·kimgipa ong·achim. Ua A·chik jatko gipin jatrangni sinchep dokchep dakanirangko nike A·chik jatko chel·chakna gita an·tangko on·kange kamko ka·aha aro uandaken ua 1899 bilsimango jatna aro a·songtangna kamko ka·chakataha.
Pa Sonaram Sangma, 1916 bilsini August 27 tariko, be·enni gita saaniko man·e Bakrapur songon a·gilsakko wate re·angaha.
Ia salko gisik ra·e manianio, Garo Hills Autonomous District Council (GHADC)-ni Chief Executive Membor (CEM) Albinush R Marak, mongsonggipa sokgipa ong·e, jinmana aganprakangengon, Pa Sonaram R Sangma-ni kamrangni gimin janapangenba, A·chikrangni kosako British sorkarini onchepanirangko chakna man·jae, A·chikrangko jakgitel ong·atna krengdilaha ine parakangaha.
Pa Sonaram Sangma-ni kamrangko pangnan gisik ra·china aro uni kamrangko mittelpilgiparang ong·china gitaba ua A·chik sakantikon didiangaha.
Iana skang, dingtang dingtang dilgiparang aro ia salko manianio bak ra·na re·bagipa pilakan, Bakrapur songo tarie donenggipa Pa Sonaram R Sangma-ni mangkrongona re·ange, pul bibalrangchi una mande ra·pilskaanikoba dakangaha.
