Garo Hills-ni ramarang namdapahaode cricket kal·susaanirangko Tura-oba sokachakna man·gen: Kuruvilla
TURA: Budbar salo, India-ni gitcham cricketer aro Board of Control for Cricket in India (BCCI)-ni general manager Abey Kuruvilla, Tura-ona re·baenba, dingtang dingtang cricket kal·susaanirangko sokachakna man·genma man·jawa, uani bidingo Tura-ni Alotgre Cricket Stadium-ko niangaha.
Kuruvilla-ni Tura-ona re·bae, ia stadium-ko nianganio, Meghalaya Cricket Association (MCA)-ni president Naba Bhattacharya, gipin dilgiparang aro Tura District Cricket Association (TDCA)-ni dilgiparangba dongpaaha.
Tura-ona re·baanio BCCI-ni general secretary-ko mande ra·pilskana gita dingtangmancha TDCA aro MCA-ni gita program-koba ong·atangjolaha aro ia program-o ua jinmana aganprakengon, salgro salaram jolrangara, India a·songo nitobatsranggipa biaprangoni damsa ong·a ine mittele aganangaha.
“Na·simang ia biapo ong·e namen rasong gnanggiparang ong·a. Manderang ia biapko chel·niktoka indiba anga an·tangde Dimapur (Nagaland), Shillong aro da·o Tura-ona re·bae nikenba, ia biapko namen an·sengnikbeaha,” ine Kuruvilla aganaha.
Tura jillara a·songni mongsonggipa songjinmarangoni chel·grikani gimin dingtang dingtang gadango cricket kal·susaanirangko ia biapo ong·atanio neng·nikanirangko chagrongnaba gnang ine janapatengon, Garo Hills-ni ramarangko nambatatna man·genchimode, ia biapoba dingtang dingtang gadangni cricket kal·susaanirangko ong·atna man·aigen ine BCCI-ni general manager parakataha.
“Garo Hills-oniba cricket kal·giparang dingtang dingtang gadango gipin biaprangona re·ange kal·na cholrangko man·engaha aro ia biaprangoba cricket-ko namniktoka. Na·simangba ia biapo cricket kal·anirangko ong·atna nangniktokenga aro chingaba iako chu·sokatna jotton ka·enga. Indiba da·o dipet chinga mamingkoba ku·rachake aganna man·kujawa. Haida ramarang namkalahaode ian chu·sokgipa ong·ani cholrang donga,” ine Kuruvilla aganaha.
BCCI-ni general manager, Tura-ona re·baanio, cricket kal·giparangko sokachakna dongimin biaprangkoba niangjolaha.
