SHILLONG: A·dokni aro a·doko songdongenggipa manderangni nanganirangna ku·rang on·ani aro warachakanian uni mongsonggipa daito ong·aigen ine Assembly-ni gital Opposition Leader (OL) ba Opposition dolni dilgipa Mukul Sangma parakataha.
Opposition dolni gital dilgipana seokako man·ani ja·man kobor ra·timgipa manderang baksa agangrikengon, sorkariko chalaianio manderangni nanganirangko chu·sokatna ku·rang on·anian opposition dolni mongsonggipa daito ong·a ine Sangma parakataha.
“Opposition dol ong·e dongengon, pangnan a·dokni aro a·doko songdongenggipa manderangni nanganirangnasa chanchie kamko ka·na nanga. A·dokni aro a·doko songdongenggipa manderangni nangani ine aganengon, manderang mai dakgipa kamrango neng·nikanirangko chagrongna nangbatenga, uarangkosa nie kam ka·na nanga,” ine ua aganaha.
Seokako man·gipa dilgiparangni daitoni gimin janapatskaengon, uamangko seoke watatgipa manderangni mongsonggipa neng·nikani aro nangnikanirangko chu·sokatnasa kamko ka·na nanga ine Songsak-ni TMC MLA aganaha.
Meghalaya a·doko chagrongna nangenggipa dingtang dingtang neng·nikanirang, mongsongbate lekka pora, an·seng baljokani aro manderangna janggi tangani cholrangko on·ani bidingo janapatskaengon, ia sal somoirango sanna bananirangko ra·anio korosrang batroroengani a·selan manderang neng·nikanirangko chagrongna nangtokenga aro a·doko Megha Health Insurance Scheme gita dakgipa program-rang donggenchimoba manderang sanna bananirangko ra·anio neng·nikanirangko chagrongna nangkuenga ine Opposition dolni gital dilgipa parakataha.
Dedrangna lekka porako on·anio dingtang dingtang nokdangrangni chagrongna nangenggipa neng·nikanirangko janapatskaengon, “An·chingni Tribal nokdangrangode pangnan dedrangrang bang·aia aro ia dedrangko dal·atanio, mongsongbate bida budirangko on·anio an·ching bang·en neng·nikanirangko man·ronga,” ine Sangma aganaha.
Dingtang dingtang bosturangni dam rakbatroroengani a·sel manderang neng·nikanirangko chagrongna nangtokenga ineba ua an·tangni suk ong·gijaniko parakataha.
 |
ReplyForward
|
