TURA: Ru·uta bilsirangonin Dadenggre Civil Division-ko gital district ba a·ja songchina dabitokengon, East Khasi Hills a·jao Sohra-ko headquarter dake gital district songani bidingo sorkari chanchikuenga ine adita salrangna skang, Assembly-ni Autumn Session-o a·dokni Deputy Chief Minister Prestone Tynsong-ni parakataniko Dadenggre-o songdongenggipa manderang jegalatani ja·man Garo Students Union (GSU) Western Zone (North) Dadenggre-ni gitaba iani bidingo jegale, a·dokni Chief Minister Conrad K Sangma-na sedoataha.
“Deputy Chief Minister-ni iako Assembly-o parakatani ja·man Dadenggre jolo songdongenggipa manderangni gisepo ka·a ding·chaoaniko ong·kattokaha maina ru·utbea bilsirangonin Dadenggre-o songdongenggipa manderangba dingtang district-na dabitokengachim,” ine GSU-WZN Dadenggre-ni president Tengsan M Marak, Chief Minister-na sedoatgipa chittio parakataha.
GSU-ni parakatani gitade, Dadenggre Sub-Division-ko 1982 bilsion songahani gimin ian Meghalaya a·doko gitchambatsranggipa sub-division-rangoni damsa ong·engachim aro Dadenggre Sub-Division-ko 1999 bilsirangonin district songchina gita jolo songdongenggipa manderang dabitokengoba dingtang dingtang sorkarirang, ia dabianiko chu·sokatchipkujaenganiara Garo Hills-ni manderangko mikchepani gitaba ong·engachim.
“Garo Hills-o songdongenggipa manderangni gitcham dabianirangko chu·sokatchenggija Khasi Hills-o gital district-ko bikotaniara Garo Hills-ko nichanggalanian ong·gen maina Meghalaya a·dokara dingtang dingtang Tribal jatrangni songdongchakenggipa a·doksa ong·ani gimin pilak jatrangan apsan dake nirokaniko man·na nanga,” ine Marak parakataha.
Dadenggre sub-division-ko gital district songgenchimode ian chadamberangna kamrangko nakatate on·na chol ong·genchim aro diltugipa songrango donggipa manderangni neng·nikanirangkoba chel·atna dakchakani ong·gnokchim ine janapatengon, ru·uta bilsirangoni manderangni dabiengggipa gital district-ko ta·raken be·en pil·atchina gita GSU Dadenggre, a·dokni Chief Minister-ko didiataha.
“Uni gimin Garo Hills-o songdongenggipa manderangni ru·utbea bilsirangna dabianiko chu·sokatchenggija Khasi Hills-o gital district songna chanchianiko donchengkuchina chinga mol·molenga. Khasi Hills-o gital district-ko bikotna nangenga ong·ode apsan daken Garo Hills-oba gital district-ko bikotna nanggen,” ine GSU WZN Dadenggre-ni president, Chief Minister-na sedoatgipa chittio parakataha.