SHILLONG: Meghalaya a·doko niam gri drugs aro koelarangko badinganio jak donga ine a·dokni Deputy Chief Minister Sniawbhalang Dhar-ni kosako matnanganirang ong·katengani gimin iani bidingo Opposition dolni dilgipa Mukul Sangma, a·songni Prime Minister-na sedoatna ku·rachakaniko on·angaha.
Iani bidingo kobor ra·timgipa manderang baksa agangrikengon, koela bikotanide a·dokni kam ong·jani gimin iandake niam gri koela bikotani kamrangkode ma·mong sorkarisa jako ra·na nanga aro MMDR Act-ni Section 21-ko pe·anirang donggenchimode uan dosko dakanian ong·a ine Sukrobar salo Sangma aganaha.
Iako jegalanio NPP-ni dilgiparang ong·jaenganaba gnang ong·jaode iandake matnanganirangna Pala-ni kosako badi ka·skana nangachim ine janapatengon, iako Vincent Pala an·tangan matnangchengahani gimin bilakbate ja·kurangko de·angkuna nanga ine Opposition dolni dilgipa aganaha.
Deputy CM-ni kosako NPP-ni gita maming ja·kurangko de·jagenchimode MPCC-ni president Vincent Pala an·tangan Prime Minister-na sedoatenba, Deputy CM-ni kosako ja·kurangko de·china u·iatna nanga maina ian uniba daito ong·a ineba Sangma aganaha.
MDA 2.0 sorkarini somoio tangka paisa jakkalsretanirang komiengahama ine sing·anina aganchakaniko on·angskaengon, skangode gipinrangni a·sel sakgipinrangsa matnangako man·rongachim indiba da·ode iandakgipa manderang dongjaha ine TMC parliamentary party-ni dilgipa aganaha.
MDA 2.0 sorkarini somoioba kragija dakanirangko nikna man·engkua ine janapatengon, iandakgipa kamrangko sorkaride jegalkuaigen ine Sangma aganaha.
“Sorkario neng·nikanirangko ba ong·gija dakanirangko namatna skanirang dongbebegenchimode iarangko kamchisa mesokna nangachim. Indiba iandakgipa neng·nikanirang donga inakoba sorkari knachakna gisiko nangja,” ine ua aganaha.