TURA: Garo Hills Autonomous District Council (GHADC)-o kam ka·giparangna Fifth Pay Commission-ni recommendation-o pangchake dormaharangko on·na gita 2018 bilsion NPP-chi dilanggipa GHADC-ni gitcham Executive Committee ge·etaniko on·ahaoba da·alonan Fifth Pay Commission-ni recommendation gita ong·gija Fourth Pay Commission-ni dormahakosa on·engkua ine Robibar salo, Tura-ni MDC aro BJP-ni state vice president Bernard N Marak parakatenba, GHADC-o kam ka·giparangna Fifth Pay Commission-ni dormahako on·na gita kamrangko niatchina a·dokni Chief Minister Conrad K Sangma-ko didiataha.
“GHADC-ni gitcham Executive Committee-rang, district council-ni namgnina chamatgipa tangka paisarangko bang·en jakkalsretahani a·sel da·alo kam ka·giparangnaba Fifth Pay Commission-ni recommendation gita dormaharangko on·na man·kujaenga. GHADC-o kam ka·enggipa manderangni Fifth Pay Commission-na dabianiara namen nangchongmotgipa dabianian ong·enga maina 2018 bilsion GHADC-ni gitcham EC aro NPP-ni CEM, iani bidingo ge·etanikoba on·manahachim. Ia ge·etanio, GHADC-ni officer-rangna aro gipin kam ka·giparangna Meghalaya Services (Revision of Pay)-o pangchake dormaha aro gipin man·na nanganirangko 2018 bilsini April jaonin on·na gita pilak department-rangnan ge·etaniko on·manahachim. Indake ong·genchimoba ia u·iataniko gipin Executive Committee-rang ja·rikjaha aro 2018 bilsioni da·alona kingkingan budget-rangkode 5th Pay Commission Scale-o tarie pass ka·enga indiba kam ka·giparangna dormahakode 4th Pay Commission-ni ning·osa on·kuenga,” ine Marak, Chief Minister-na sedoatgipa chittio parakataha.
2014 bilsio ANVC dolrang baksa ma·mong aro a·dok sorkarirangni songgigrike soi ka·grikanikoba a·dok sorkari chu·sokatchipkujaenga ineba Tura-ni MDC parakataha.
“ANVC dolrang baksa songgigrikani ja·man GHADC-ni ning·o namroro silroroanina ma·mong sorkari gong kror 100.71-ko aro uni ja·manba baditaba chang tangka paisarangko chamatahachim indiba GHADC-o NPP-chi dilanggipa Executive Committee-rang, a·songni namgnina chamatgipa tangka paisarangko jakkalsretaha. Ia tangka paisarangko songgigrikanio pangchakesa ma·mong sorkari chamatahaoba ANVC dolrangnade mamingkoba u·iatchipjaha aro a·dok sorkarini monitoring committee-ba chu·sokatchipjaha. GHADC-o kam ka·giparangni dormaharangna ma·mong sorkarini chamatgipa gong kror 53 tangkarangkoba Executive Committee-rang, dingtang kamrangna jakkalaha aro kam ka·giparangni dormaharangkode on·chipjaha. Dingtang dingtang project-na chamatgipa tangka paisarangoni 40 percent-de contractor-rangna gamgija council-onin gimaaha,” ine Marak parakatenba, iandake tangka paisa jakkalsretanirangko chugipa gadango sandirokatchina Chief Minister-ko didiataha.
2014 bilsio ANVC dolrangni ma·mong aro a·dok sorkarirang baksa songgrikanirangkoba chu·sokatchina gita Tura-ni MDC, a·dokni Chief Minister-ko didiataha.