SHILLONG: 2024 bilsiona kingking Meghalaya a·doko Protection of Children from Sexual Offences (POCSO) Act-ni ming 894 case-rangko matchotatna man·ahaoba ming 1747 case-rang bangki dongkuenga ine nikna man·aha.
Iandakgipa case-rangko jako ra·na gita a·doko damdok POCSO Special Court-rangko kuliahachim aro ia court-rangara, East Khasi Hills a·jao damgni, West Khasi Hills, West Jaintia Hills, Ri Bhoi aro West Garo Hills a·jarango damprak donga.
Ia a·jarango ia Special Court-rangko kuliahaoba, POCSO case-rang baksana gipin case-rangkoba judicial magistrate-rang jako ra·na nange, iandakgipa case-rangko bon·atanio neng·nikanirangko chagrongna nangskaenga.
POCSO case-rangko bon·atanio ja·manchakengani a·selrangara, hearing-rangko dontongatchengrongani, matnanga man·gipa, tangrikenggipa aro sakki on·gipa manderangni kachariona sokbaronggijanirangan ong·achim. Apsan daken, saanirangko man·ani, porikkarang dongani aro dingtang dingtang a·selrangkoba ia POCSO case-rangko bichal ka·anio ja·manchakani ine agana.
POCSO case-rangna agreba, Meghalaya a·doko Juvenile Justice Board (JJB)-rangba 2024 bilsini June jaona kingkingan ming 280 case-rangko jako ra·anio neng·nikanirangko man·na nangenga ine kobor on·aha. Bi·sarangni kosako ong·gija dakanirang batroroengani a·selan ia case-rangko matchotatanio neng·nikanirangkoba bariatenga.
Da·o dipet Meghalaya a·doko iandakgipa bi·sarangna damgittam nokrang donga aro ia nokrangara, East Khasi Hills aro West Garo Hills a·jarango ong·a.