SHILLONG: Re·anggipa August-ni 25 tariko, Ri Bhoi a·jao donggipa Umran Petrol Pump-ko chadrapenba, tangka paisarangko ra·seke ra·anina Ri Bhoi a·jani police-rang, mande sakgittamko rim·aha aro Nagaland a·dokni police-rangba saksako rim·dapna man·aha.
Rim·ako man·gipa manderangara Nagaland a·dokoni ong·achim aro ia manderangoni sakgittamde, Dimapur-o donggipa Burma Camp Veterinary Colony-oni bilsi 25 ong·gipa Bokavi Zhimomi, Dimapur-o donggipa Urban Housing Block-II-oni bilsi 32 ong·gipa Pashen Lam aro Dimapur-o donggipa Rail Bazar-oni bilsi 18 ong·gipa Rokongulie Kepu ong·a.
Ri Bhoi a·jani Superintendent of Police (SP) Jagpal Singh Dhanoa-ni parakatani gitade, rim·a man·gipa manderangko da·o kachario mikkangpaatenga aro ia manderangko salbongana police-rangni ning·o donkuchina kachario bi·aha.
Indake ong·engon, ia a·selo jak donganina sakgipin mandekoba Nagaland a·dokni Tuensang police-rang rim·aha ine kobor on·aha. Ia mandeko Meghalaya a·dokona rim·bana gita Ri Bhoi a·jani police-rang, Nagaland a·dokona re·chakatangaha.
Petrol pump-ko dakait dakna ia manderangni jakkalgipa NL-07 CB0156 Bolero garikoba police-rang rim·aha ine kobor on·aha.
Re·anggipa August 25 tarik pringo, Ri Bhoi a·jani Umran Dairy-o donggipa petrol pump-oniko ma·sina man·gijagipa mande sakbri, gong 4,24,614 tangkarangko ra·seke katangahachim.
Ia manderang, petrol pump-ni manager aro gipin kam ka·giparangkoba chadrapangaha aro uandaken petrol pump-ni manager, adita mata bu·anirangko man·na nangahachim.
