SHILLONG: Bangladesh a·songo so·sojengjeng ong·anirang namsrangkujaengon, Meghalaya a·dokni simarang gita Bangladesh a·songni manderangko napsrukbana on·jawa ine ma·mong sorkari ku·rachakaniko on·aha.
Meghalaya a·dokni Chief Minister Conrad K Sangma-ni parakatani gitade, songre songgabatani maming lekka gri Bangladesh a·songni manderangko, Meghalaya a·dokni sima gita re·napbana on·jawa ine Union Home Minister Amit Shah, una chitti seachi aro uko gronge agangrikani somoioba ku·rachakaniko on·ataha.
“Niam gri napsrukbagiparangko bang·a bang·jade niknaba gnang indiba Bangladesh a·songoni niam gri jinma napdrabaanirangkode an·ching nikna man·jawa,” ine Sangma aganaha.
“Bangladesh a·songo ong·enggipa obostarang namkalanggen ine chinga ka·dongenga. Obostarang da·oba namsrangkujaenga indiba a·bachengona batede da·o obostarang on·tisa namkalengaha. Simarango bading chiwalgrikanirangba da·o ka·sinsin a·bachengpiltaiengahani gimin ian namgipa chin ong·enga. Re·baenggipa sal somoirango maming dal·a a·selrang ong·taijana anga ka·dongenga indiba an·ching mikrake aro simsake dongna nanga,” ine Chief Minister aganaha.
Bangladesh a·songo so·sojengjeng ong·engani gimin niam gri Meghalaya aro salgro salaramni gipin a·dokrangona katnapbaani cholrang donga ine a·dokni dingtang dingtang dolrang, sorkarina mikrakatanirangko on·engachim aro salgro salaram a·dokrango Bangladesh a·songni darangkoba nokchakjachina diditokengachim ine nikna man·a.
Indake ong·engon, re·baenggipa September-ni 9 tariko GST Council-ni tom·aniko Delhi-o ong·atengani gimin ua ia tom·anio bak ra·na re·angenga ineba Chief Minister parakataha.
“Delhi-ona re·anganio anga Home Minister-koba grongjolgen aro Border area development-na project-rangko on·dapatchina aro simarango warachakanirangko mangrakbatatchina mol·molgen. Ian dam 10 simarangko chipani kattasan ong·ja indiba simarango chel·chakanirangko bilakbatatani aro simarango songdongenggipa manderangna nambata cholrangko on·aniba ong·gen,” ine Sangma aganaha.