WGH-jolni manderang, agriculture officer-ni kosako badi ka·a

Tura: West Garo Hills (WGH) Rajabala constituency ning·o donggipa Askikandi-jolo donggipa manderang, agriculture inspector, Soyod Zaman-ni kosako songo uni gaonbura-ni kamko jako ra·e ka·ani bidingo Directorate of Agriculture-na badi ka·aha.
Songni manderang bang·en soi ka·a gnanggipa badi ka·ani lekkako mijalo on·aha.
Badi ka·giparangni aganani gita, Zaman South West Garo Hills district-o sorkarini officer ong·enga indiba a·dok sorkari aro GHADC-ni ning·o jako ra·ako man·gipa kam songni headman ba gaonbura-ni kamko Askikandi-ni mande saksa ong·e jako ra·aha.
“Sorkario kam ka·gipa mandeko chinga chingni gaonbura ong·ako chinga nangnikja maina sorkario kam ka·gipa apsan somaio kam minggnion uni kamko ka·na man·ja. Uni Gaonbura-ni kako ta·raken ra·galako nangnikenga,” songni manderang aganaha.
Zaman kam minggniko ka·e a·dok sorkarini kam ka·ani niamrangko pe·a ga·akenga aro niam gita sastiko man·a kragipa ong·achim, songni manderang aganaha.
“Zaman-ni kosako department-ni gita ja·ku de·aniko aroba uni sorkarini kam ka·ani niamrangko pe·aina aro niam gri dakanina uni kamko ta·raken bon·atako chinga nangnikenga” badi ka·giparang aganaha.