SHILLONG: Meghalaya sorkarini kamrango namana agan-ku·pattianirangko on·ani pal batesa sorkarini kamrangko matnangronga ine Budbar salo National People’s Party (NPP), Voice of the People’s Party (VPP)-ko matnangatskaaha.
“Sorkari namako dakgenchimoba Opposition dolrangni matnangsimaniara kraani ong·ja. Konta 24 sorkarini kamrangko matnange dongaigija gisepode uamang sorkari baksaba bakrimaniko on·na nanga. Uamang ma·sigipa dilgiparang ong·e ong·gija kamrangkosan niaigija namakoba chanchina nanga,” ine Budbar salo, NPP-ni dilgipa aro a·dokni Cabinet Minister Rakkam A Sangma aganaha.
KHADC aro JHADC-ni term-ko jadokna a·dok sorkarini ra·dodapattaianiara district council election-o amako man·na kene dakanisa ong·aha ine Opposition VPP dol sorkarini kosako matnanganirangko dakahachim.
“Election-ko January, February ba March jao ong·atgenchimoba election-ko VPP, NPP ba jeba chena nangode cheaigen. Iani gimin uamang maina jajrengengenga? Manderang na·simango ka·dongenga ong·ode da·al, knal ba uni ja·manba pu·onaigen aro ian maming neng·nikani dongna nangja,” ine Sangma aganaha.
KHADC aro JHADC-ni constituency-rangko sualpiltaianio kamrang matchotkujani giminsa district council damgnini term-ko ra·dodataina nangaha ineba ua talataniko on·angaha.
KHADC aro JHADC-ni term-ko jadokna ra·dodaptaiahani gimin ia district council damgnini election-ko 2025 bilsini March 5 tarikosa ong·atani ong·engahachim.