RESUBELPARA: Sukrobar salo, Meghalaya Legislative Assembly-ni ning·o donggipa Petition Committee-ni tom·aniko, committee-ni chairman aro Bajengdoba MLA Pongseng R Marak-ni dilanichi, North Garo Hills a·jani Mendipathar Multi Purpose Cooperative Hall-o ong·atangaha aro ia tom·anio, committee-ni membor-rang, chong·motan Rambrai-Jyrngam-ni MLA Remington Momin, Rajabala MLA Dr Mizanur Rehman Kazi aro Chokpot-ni MLA Sengchim N Sangma-ba bak ra·angaha.
Garo Hills-o Petition Committee-ni tom·aniko ong·atani ian skanggipa chang ong·aha aro ia tom·anio committee-ni membor-rang, committee-ni dongimin niamrangko talate on·angenba, sorkarini kamrangko chu·sokatanio bakrimanirangko on·china jolo songdongenggipa manderangko didiangaha.
Ia tom·anio Petition Committee-ni Chairman aro Bajengdoba-ni MLA Pongseng Marak, ia tom·aniko ong·atani bidingo jinmana agan-talate on·angengon, an·tangtangni chagrongna nangenggipa dingtang dingtang neng·nikanirangko committee-na seachi u·iatchina didina aro sorkarini kamrango manderangko bak ong·atna ia tom·aniko ong·ataha ine parakataha.
Manderangni neng·nikanirangko ia committee-ni nienba namatna gita kamrangko ka·gen ineba Marak ku·rachakaniko on·angaha.