SHILLONG: Khasi Hills Autonomous District Council (KHADC) aro Jaintia Hills Autonomous District Council (JHADC)-ni constituency-rangko gital dake sualpiltaiani kamrang matchotkujaengani gimin ia district council damgnini term-ko jadokna ra·dodapattaianiko Voice of the People’s Party (VPP) jegalattaiaha.
Ia district council damgnini term-ko ra·dodapattaiahani gimin a·dok sorkariko matnangatengon, KHADC aro JHADC-ni constituency-rangko sualpiltaianiara election-ode maming nangchakeani dongna nangjachim ine Shillong-ni MP aro VPP-ni dilgipa Ricky AJ Syngkon parakataha.
KHADC aro JHADC-ni term-ko September 5 tarikoni re·baenggipa 2025 bilsini March 5 tarikona kingking jadokna ra·dodapattaiahachim.
KHADC aro JHADC-ni constituency-rangko sualpiltaina man·na gita a·dok sorkari, ia district council damgnini term-ko iana skangba 2024 bilsini March 5 tarikonin jadokna ra·dodapahachim.
KHADC aro JHADC-ni term-ko ra·dodapattaiahani gimin sorkariko matnangatskaengon, ia sal somoirango bang·a manderangan VPP-na chakpaanirangko on·engani giminsa NPP-chi dilenggipa MDA sorkari, election-ko ong·atna kene, ia district council damgnini term-ko ra·dodaptaiaha ine Syngkon parakataha.
District council damgnini term-rangko ra·dodaptaianiko VPP-san jegalenga ong·ja indiba manderangba jegaltokenga ineba ua aganaha.
2023 bilsini Assembly election-o VPP-ni sakbri MLA-rangko seoke ia constituency dambrini manderang sikkimpiltokenga ine adita salrangna skang, KHADC-ni Chief Executive Membor aro NPP-ni dilgipa Pyniaid Sing Syiem-ni agangipa kattarangko jegalatengon, re·anggipa April jao ong·atanggipa Shillong Lok Sabha constituency-oba uamang Khasi-Jaintia Hills a·jani bang·bata Assembly constituency-rangon vote-rangko bang·bate man·aha ine Shillong-ni MP aro VPP-ni dilgipa Ricky AJ Syngkon gisik ra·atpilaniko on·angaha.
“Ian sorkarini kamrango manderangni suk ong·gijaniko aro dingtanganiko nangnikenganikosa mesokani ong·aha,” ine Syngkon aganaha.