TURA: Bang·a somoirango Meghalaya a·arangko Assam sorkarini kangdrana jotton ka·rongengani gimin Garoland State Movement Committee (GSMC) Pedaldoba unit jegalatenba, iani bidingo ta·raken ja·kurangko de·china a·dokni Chief Minister Conrad K Sangma aro Meghalaya sorkariko didiataha.
GSMC Pedaldoba regional unit-ni chairman Rimjen Sangma-ni u·iatani gitade, re·anggipa Budbar attamo, Raksamgre Civil Sub-Division-ni ning·o donggipa Pedaldoba songo mongma bi·sa mangsa siako songni manderang nikaha. Indiba ia mongma bi·sa siani koborko man·soa bakan Assam-ni police-rang, Bristibar pringnian ia biapona re·bae, ia mongma bi·sani sigipa biapara Assam ning·osa ga·aka ine a·kangenba mongma bi·sako Assam a·dokona ra·angna jotton ka·ahachim.
“Ia biapara Meghalaya a·dok ning·on ong·genchimoba Assam police-rang, ia mongma bi·sani sigipa biapko Assam ning·o ine kangdraenba mongma bi·sako ra·angna jotton ka·ahachim indiba ja·mano Meghalaya Police, Pedaldoba-ni GSMC aro songni manderang, iani bidingo Assam police-rang baksa jere ra·grikanio sokaha aro uni ja·mansa ia biapara Meghalaya a·dok ning·on ong·a ine ma·sienba dolgnini gisepo meligrike sigimin mongmako Assam-ni police-rang, Meghalaya a·doknan pakwate re·angpilaiaha,” ine Sangma parakataha.
Ia a·selni bidingo Raksamgre Civil Sub-Division-ni SDO Daplin D Sangma-ba kobor man·soe, ia a·sel ong·gipa biapona re·baaha aro mikkangchi iandakgipa obostarang ong·taijana gita ua bakan Assam-ni deputy commissioner baksa agangrikna ku·chakaniko on·angaha ineba GSMC Pedaldoba unit-ni chairman parakataha.
“Chinga GSMC Pedaldoba Unit-ni gita Assam-ni napdrae kakketko sandichenggija Meghalaya-ni a·ako Assam-ni a·a ine a·kanganiko rakgen jegala. Je a·sel ong·chakgipa biapara Meghalaya ni a·a ong·chongmota aro 1972 bilsini map-ko niatgenchim ong·ode Garo Hills-o ro·batsranggipa chibimarangoni dilsa Jinjiram chima paksa gitasa Meghalaya-ni a·a ong·a. Name niatgenchim ong·ode Assam a·doksa Meghalaya-ni a·ako bang·en a·kangroroangenga,” ine Sangma parakatenba, mikkangchi iandakgipa golmalrang ong·taijana gita ta·raken Assam sorkari baksa agangrikchina, a·dokni Chief Minister Conrad K Sangma-ko mol·molataha.