JOWAI: Badingsrukna jotton ka·enggipa mang 64 matchurangko Meghalaya a·songgipin sima-arioniko Meghalaya-ni BSF sipairang rim·aha. Ua matchurangko Meghalaya West Jaintia Hills district-ni sima-ari a·jol gita Bangladesh-ona badingsrukatengachim.
Sriksrik kobor on·atako man·e 4th Battalion-ni BSF sipairang a·songgipin sima-arioniko sandiaha. Sandion sandigipa dol Bangladesh-ona badingsrukna tarie buring a·jolo donue donenggipa mang 64-ko naljokataha. Rim·gipa matchurangko nanga gita ja·ku de·china a·jolni police station-na pakwatataha.
Damgipin biap East Khasi Hills-ni a·songgipin sima-ari gita Bangladesh-ona badingatna bol gittam Bolero pickup garirango salanggipa 12,000 kg ong·gipa chinirangko BSF sipairang rim·aha.
Indo-Bangla sima-ario badingsrukani kamrangko rim·na nirikkianirangko rakbatataha aro jotton ka·kuenga, BSF January jaonin a·dokni dingtang dingtang sima-ari a·jolrangoniko Bangladesh-ona badingsrukgipa mang 800-na batgipa matchurangko aro 2310 ton chinirangko rim·na gita man·aha.
