Bostu salgipa rel gari dongjani gimin bostuni dam barienga: Sorkari

SHILLONG: Bostu salgipa train ba rel gari dongjani a·sel a·doko bosturangni dam barienga ine Meghalaya sorkari aganaha.
A·doko bosturangni dam namaia, bilongdatja, niatgenchimode salgro salaram a·jolni gipin a·dokrang baksa tosusagrike niode inditana dingtanggrikani dongja ine Food and Civil Supplies & Consumer Affairs-ni Minister Comingone Ymbon aganaha.
“Department-ni u·iatani gita, gimik Deputy Commissioner-rang, salantian bosturangni damko nirokenga. Bostuni dam barija, dam namaia, iako rakkina chinga raken kam ka·enga ine aganaha. Minggipin VPP, bosturangni dam bariani gimin salsa jingjengatangaha.
“MDC election sepangengjok, da·ode manderangko togitaignok, ine minister aganaha.
Northeast-o bosturangni dam bariako nirokna mechanism ba niam donga aro gipin a·dokrang baksa tosusaata ong·ode bosturangni damo bang·e dingtanggrika dongja, haida 50 paise ba gong·sarangsan dingtanggriknaba gnang.
Dingtang dingtang bosturangni dam jekai- be·en-bitin aro me·su-samjakni dam baridapjok. Iara gipin a·dokrangoniko ra·baani gimin damko bariatna nangao ga·aka.
Wholesale aro retail-ni dam dingtanggrika maina dokan dakgiparang bajar-antioniko bosturangko dokanona salna tangka koros ong·ako ra·na nanggen uni gimin retail-o dam dingtanga, indiba bosturangni damko regulate ka·a ba niam gitasa damko tik ka·a ine Minister agandapaha.
Indake ong·engon Food and Civil Supplies department-ni Commissioner aro Secretary Pravin Bakshi, bosturangni damko nirokani mechanism ba niamrangko talataha.
Ministry-ni centralised dashboard-o pangchakesa Price monitoring system-ko dona. Food and Civil Supplies department, nangchongmotgipa bosturangni damko sandie dashboard-o apsankon dona.
“Price monitoring dashboard-ko nie, an·chingni a·doko essential commodities ba nangchongmotgipa bosturangni dam badita ong·a, iako nina gita man·a. Indiba ian northeastern a·jaosan ong·aigen.
Minggipin dokan ge·antion bosturangni dam apsan ong·jawa, indiba 10-20 percent gita gita dam barianga ong·ode, ian bostu dam bariako mesoka ine Bakshi aganaha.
Uandake gimik dokanrangon bosturangni damko mesokna nangchongmota, jemangan niamko pe·a uamangni kosako ja·ku de·na mikrakataha. Aro jinma manderangkoba gisik seng·e dongchina aro maiba ong·gijako nika nong·ode badi ka·china agan-ku·pattiaha.