Chokpot: Krishi Vigyan Kendra (KVK), South Garo Hills (SGH), 100 Days Action Plan-ni ning·o ‘Value addition of locally available fruits’-ni bidingo uamangni sal bongana ong·atgipa vocational training program tom·tome matchotaha.
Training-ko Meghalaya State Rural Livelihoods Society, BMMU, Chokpot baksa nangrime ong·ataha aro Sep 9-oni a·bachenge aro Sep 13-ona matchotataha uno Chokpot sub-division-oni sak 50-mang game-sue cha·giparang aro me·chikrang bimchipen bakko ra·aha.
Training programe-ni Course Co-ordinator, Basu Langpoklakpam, Subject Matter Specialist (Horticulture) a·bachenge Te·kring, Chinara, Assam lemon (Kakji) Aonla (Ambare) aro Tomato (Baringbelati) gita joltango man·a amgipa bolam-biterangni gamchatani gimin nisan done training on·aha.
Program-o skie on·anirango bakko ra·giparang Te·kring achar, Chinara Ready to serve (RTS) ringani ba bitchi, Assam lemon Squash, Tomato ketcup aro Aonla achar-ko tarianio aro done cha·na skie on·anirango bakko ra·giparang changa-sapaniko skia man·aha.
Man·kari ja·mano noksan ong·anirangko komiatachi joltango game-sue man·anirangko man·batatna aro pale-sime cha·giparangko bilakbatatna traning on·ani miksongani ong·a. Gitalgipa nangenggopa chang-sapanirang joltangni tangka-paisa man·ani cholrangko bilakbatatna aro South Garo Hills-o gama-su·ani bewalrangko nakatrikrikaniko nambatatna ka·dongsoenga.
