TURA: North Garo Hills a·jani dingtang dingtang biaprango nosto ong·e dongenggipa ramarangko taripile on·china gita didie, A·chik Holistic Awakening Movement (AHAM) Kharkutta unit, a·dokni Chief Minister Conrad K Sangma-na sedoataha.
Chief Minister-na sedoatgipa chittio AHAM Kharkutta regional unit-ni parakatani gitade, North Garo Hills a·jani bang·bata biaprangon rama jal·langrang namsrangjaengahani a·sel jolo songdongenggipa manderang, mongsongbate skulrangchi re·enggipa chatro chatrirang aro bading chiwalgiparang namen neng·nikanirangko chagrongna nangtokengahachim.
North Garo Hills a·jao taripile on·na nangenggipa mongsonggipa ramarangara, Kharkutta Bazar PWD rama, Kharkutta Rewansing-oni Block-ona dakanggipa rama, Me·gam A·kong rama, Baghabatta Bazar-oni Do·singkol-ona dakanggipa rama, Lower Rongbu, Kentra PWD rama aro gipinrang ong·a ineba AHAM Kharkutta regional unit parakataha.
Ia ramarang namsrangjahani a·selan cycle-rango aro scooty-rango skul ba college-rangchi re·rurana nangenggipa chatro chatrirang neng·nikanirangko chagrongna nangtokenga ine janapatengon, ramarang namsrangjahani a·selan bang·bata changon scooty aro cycle-rangko skul aro college-rangchi re·enggipa chatro chatrirang ramao a·sel ong·anirangko chagrongna nangtokenga ine AHAM Kharkutta regional unit parakataha.
Skangode te·rik game ge·e cha·giparang, an·tangtangni cycle-rangon te·rikrangko bazar antirangona salbae man·dapanirang batrongachim ine janapatskaengon, da·ode ia ramarang namsrangjahani gimin te·rik game ge·e cha·enggiparangba cycle-rango re·na man·jae mahindra pik-up gita dakgipa garirangosa te·rikrangko Daranggre te·rik bazar-ona ra·angna nangtokenga aro iani a·selan koros ong·e noksan ong·na nangtokenga ine AHAM Kharkutta regional unit parakataha.
Jolo songdongenggipa manderangni neng·nikanirangko chel·chakna gita ta·raken ia ramarangko tarina gita tangka paisarangko chame on·china aro ramako taripilna gita department-na ge·etaniko on·atchina AHAM Kharkutta regional unit, a·dokni Chief Minister Conrad Sangma-ko didiataha.
