TURA: General Administration Department (GAD)-ni a·a ine a·kangenba, Tura songjinmani Leprosy Colony-ko sorkarini tona miksongengako gittimo songdongenggipa manderang jegalataha aro ian baditaba bilsirangna skang gitcham deputy commissioner-ni a·kangani gita sorkarini a·ao ga·akja ine parakattokaha.
Iani bidingo jegale, a·dokni Chief Minister Conrad K Sangma-na sedoatengon, West Garo Hills a·jani gitcham Deputy Commissioner Pravin Bakshi-ni bimingo GHADC-na seatgipa chittini bidingo janapataha aro ia gittimni a·arangara GAD-ni a·ao ga·akja ine Leper Colony-o songdongenggipa manderang parakataha. Official seal gri Bakshi-ni soi ka·gipa chittini copy-koba gittimni manderang, Chief Minister-na seatgipa chitti baksa on·chapataha.
“Konchi gittimo songdongenggipa manderangni a·ako sorkarini ra·sekna jotton ka·aniara Sixth Schedule-ni niamrangko pe·ani gita ong·enga aro ian chingna on·gimin bilrangko pe·ani ong·enga. Sixth Schedule area-o ga·akgipa a·ako a·dok sorkari ra·sekdrana bil dongja,” ine Chief Minister-na sedoatgipa chittio, Leper Colony-o songdongenggipa manderang parakataha.
Ia gittimni a·arangko tojachina sorkariko didiatengon, manigija ia gittimni a·arangko togenchimode uamang kachari aro Human Rights Commission-o badi ka·na draatako man·gen ine Leper Colony-o songdongenggipa manderang mikrakataniko on·angskaaha.
