TURA: Shillong IT Park-ni chu·sokgipa ong·ani ja·man da·o Tura-oba IT Park-ko Tura songjinmani rikamo rikna a·bachengataha aro ia kamrangko Badri Rai & Company (BRC) jako ra·e ka·engaha.
Ia IT Park project-ara DoNER Ministry-ni PM-DevINE-ni ning·o a·bachengatgipa project ong·a aro Tura-o ia IT Park-ko gong kror 126 korosrangchi rikenga.
Ia project-ko 2024 bilsini January jao sanction ka·aha aro kamko ja 36-ni gisepo matchotatna gita somoiko donmanaha.
Ia project-ni kamrangko a·bachengatani somoio adita neng·nikanirangko chagrongna nangahaoba, ia IT project-ni pangchakaniko jagnina skangan songna a·bachengataha aro ia kamko nirokna gita sak 100-na baten company-ni manderangko donataha.
Ia IT Park-ko acre 7-na batgipa a·ao rikenga aro ian IT-ni kamrango dingtanganiko ra·bana ka·dongenga.
Ia project-ni kamrangko a·bachengatani bidingo kobor ra·timgiparangna u·iatengon, “Da·o dipet chinga kamrangko nirokna gita sak 100-na baten manderangko ia biapo donenga aro mikkangchi kamrang bang·batangkuna siengani gimin chinga labour-rangkoba baridapatgen. Da·o dipet ia IT Park-ko rikanio kam ka·enggipa manderangoni 60 percent-de joltangni manderangan ong·enga,” ine kamko nirokenggipa BRC-ni project manager Vikash Lahon aganaha.
Kamrangko jagnimangna skang a·bachengataoni a·a cho·anirangde da·o 90 percent-ni gita matchotangengaha ineba Lahon parakataha.
Ia IT Park-ko pakwate on·china gita 2026 bilsini December jako somoi donsomanahaoba uamang 2025 bilsini December jani gisepon kamrangko matchotna ka·dongenga ineba BRC-ni project manager aganaha.
Lahon-ni aganani gitade, ia IT Park-o gimik gadangbri nok donggen aro ia nokni apalaniara 1 lakh square feet-na batgen.
Ia IT Park-ko rika matchotahaode komibeoba sak 4000 manderangna kamrangko on·na man·gen ine sorkari ka·dongenga.
“Shillong IT Project-ni skanggipa bako da·o sak 3000-mangni gita manderang, kamrangko ka·e cha·na chol man·engaha aro ia project-de Shillong IT project-ni skanggipa bakna bateba dal·bata. Shillong IT Park-oniko sorkari japrakon gong lak 35-mangni gita pararangkoba man·enga,” ine company official saksa aganaha.
“Ia IT project-de Garo Hills-o songdongenggipa manderangni namgninan ong·engani gimin chinga ia kamko ta·raken matchotatna nangnikenga. Ia IT Park, a·gilsakni gipin biaprango donggipa namnamgipa nokrang gitan ong·gen,” ine BRC-ni project manager aganaha.