SHILLONG: Re·anggipa April jao ong·atanggipa Lok Sabha election-o Voice of the People’s Party (VPP) chu·sokgipa ong·na man·ahaoba da·o ong·atna sienggipa District Council election-ode chu·sokna man·jawa ine Meghalaya Pradesh Congress Committee (MPCC)-ni president Vincent H Pala a·kangataha.
Iani bidingo kobor ra·timgiparang baksa agangrikengon, Lok Sabha aro District Council election-rangde namen dingtanggrika ine Pala aganaha.
“Dam 36 Assembly constituency-rang donggipa Shillong Lok Sabha seat-na sakbri sakbonga candidate-rangsan susaenga indiba KHADC aro JHADC-ni dam 58 seat-rangode sak 150-na baten candidate-rang susaenga,” ine Pala talataniko on·angaha.
District council election-o nakatgipa kamrangde Parliamentary election-oni namen dingtanggrikgen ineba ua aganaha.
“District council election-o susaani bewalrang namen dingtanggen. Chinga pilak constituency-rangon candidate-rangko susaatna jotton ka·na siengani gimin constituency dampraknan gisik on·na man·gen,” ine MPCC-ni president aganaha.
Pala-ni aganani gitade, ia chang Lok Sabha election-o VPP-ni vote man·aniara, 2009 bilsio uni skanggipa changna Shillong Parliamentary seat-o susachengmiting somoio 53 percent man·gipa vote-rangming apsan ong·aia.
“Lok Sabha election-ode pangnan bang·a vote-rangchi chena man·rongaia,” ine ua aganaha.
KHADC aro JHADC election-o VPP-na maming kenna nangani dongjawa ineba Pala aganaha.
“Gital political dolnade pangnan balwa namrongaia maina KHNAM aro PDF-ko a·bachengatani somoion an·ching iako nikna man·aha. Baditaba bilsirangni ja·mansa VPP-ni giminba an·ching name ma·sigen,” ine MPCC-ni president aganaha.
District Council election-o manderang Congress dolkon seoktaigen ineba Pala, an·tangni ka·dongchakenganiko parakataha.
 |
ReplyForward
|
