SHILLONG: NPP-o napanggipa Congress dolni gitcham MLA sakgittam, chong·motan Celestine Lyngdoh, Charles Marngar aro Gabriel Wahlang-ni kosako sal 14-ni gisepon ja·kurangko de·china Congress dolni saksakamkam MLA Ronnie V Lyngdoh, Assembly-ni Speaker Thomas A Sangma-ko didiataha.
Ia sakgittam MLA-rangni case-ara namen bilakgipa ong·a ine janapatengon, sal 14-ni gisepo Assembly-ni Speaker, ia sakgittam MLA-ni kosako maming ja·kurangko de·jagenchimode Meghalaya High Court-o badi ka·skana Congress ka·mikkenataniko on·angaha.
Ia MLA sakgittamni kosako Assembly Speaker-na sedoatengon, Indian Constitution-ni Tenth Schedule ning·o donggipa Paragraph 2(1)(a)-o pangchake, party-ko wate katahani gimin ia sakgittam MLA-rangko disqualify ka·china Lyngdoh didiataha.
Ia MLA sakgittamni party-ko wate NPP-o napanganiara Indian Constitution aro Congress-ni niam bidikko pe·ani gita ong·aha ineba Congress MLA janapataha.
“Indian National Congress (INC) baksa agangrikchenggija aro ra·chakchenggija ia MLA sakgittam, NPP-o napangaha aro INC-ko NPP baksa bak ong·atna jotton ka·aha. Ia MLA-rangni NPP-o napanganiara kakketan ong·a aro iako songbadrangoba bang·en janapaha,” ine Lyngdoh parakataha.
Congress MLA-ni badi ka·doangani gitade, Tenth Schedule-ni Paragraph 2(1)(a)-ni niamrango pangchake ia MLA-rangko disqualify ka·na man·a.
NPP-o napanggipa gitcham Congress MLA sakgittamni kosako Congress dolni saksakamkam MLA Ronnie V Lyngdoh, Meghalaya Assembly-ni Speaker-na changgni dake badi ka·doangaha.
Skanggipao ua, Mawhati-ni MLA Charles Marngar aro Nongstoin-ni MLA Gabriel Wahlang-ko disqualify ka·china ba MLA ong·aoniko champengatchina didie re·anggipa September-ni 9 tariko Assembly Speaker-na sedoataha aro unmi ja·man Umsning-ni MLA Celestine Lyngdoh-ni kosako September-ni 16 tariko sedoatskaaha.
