SHILLONG: Re·baenggipa September-ni 24 tariko chang 155-gipa Garo Hills Day-ko Tura-o manianggen ine Tura-ni MDC aro BJP-ni state vice president Bernard N Marak parakataha.
Marak-ni parakatani gitade, ia apsan salon ANVC aro ANVC-B dolrangba sorkari baksa tom·tomanina songgigrikani gimin Garo Hills Day-ko ANVC dolrangni sorkari baksa songgigrikani sal baksa apsan manianggen.
“Chang 155-gipa Garo Hills Day-ko September-ni 24 tariko Tura-o manianggen. Ia apsan salon ANVC aro ANVC-B dolrangba Meghalaya a·dokni Autonomous District Council (ADC)-rangko mangrakbatatna gita sorkari baksa songgigrike soi ka·grikahani gimin ian A·chikrangni gimagimin itihasko tangchaatpilna namgipa sal ong·enga,” ine Tura-ni MDC parakataha.
Garo Hills Day-ko maniani bidingo talate on·angengon, “1869 bilsini Garo Hills Act-ko Governor General ra·chakaha aro ia niamni ning·o Garo Hills-ko Zamindari system-oniko ma·ekate, Garorangna jakgitelgipa district-ko songaha. Ia salon Garorang, British sorkarini somoio Zamindari system-oni aro gipin niamrangoni jakgitel ong·aha,” ine Marak parakataha.
Ia salara Garorangna namen dingtangmanchagipa sal ong·a ine janapatskaengon, “Ia salo A·chikrang mikkim rasong baksa aro kusi ong·e manina nanga. ADC-rangko mangrakbatatna songgigrikanio soi ka·giparangoni saksa ong·e aro Tura-ni seokako man·gipa MDC ong·e ia salko angni constituency-o manianggen,” ine Tura-ni MDC aro ANVC-B-ni gitcham dilgipa Bernard N Marak parakataha.
