SHILLONG: Adita bilsirangna skang an·tangko bame on·gipa Hynniewtrep National Liberation Council (HNLC) bobil dolni mande saksako Bristibar walo police-rang rim·aha.
Police-rangni u·iatani gitade, bilsi 41 ong·gipa Sromwell Mawdoh-ko, HNLC bobil dolni tangka dabiatgipa manderangoniko tangka giltime on·ahani gimin Bristibar walo, Rynjah police station-ni ning·o donggipa Umpling Dongsharum-oniko rim·aha.
“Bame on·gipa HNLC-ni Sromwell Mawdoh, tangka dabiani chittirangko man·sogipa manderangoniko tangka gile HNLC bobil dolna on·skaengani gimin Ri Bhoi a·jani police-rang rim·aha,” ine Sukrobar salo police officer saksa kobor ra·timgiparangna parakataha.
Ia mande, adita bilsirangna skangsan, KSU-ni gitcham dilgipa Frederick Kharmawphlang baksa East Khasi Hills a·jani police-rangna bame on·ahachim.
Adita salrangna skangsan Shillong-o bading chiwalgipa manderangna tangka dabiani chittirangko on·enga ine badi ka·anirangko man·soahani gimin police-rang, HNLC bobil dolni kosako mokordoma ka·enba, am·sandianirangko dakengahachim.
Police officer saksani parakatani gitade, bading chiwalgiparangoniko tangka paisarangko dabienga ine badi ka·anirangko man·soani ja·man SP-ni gadango inquiry-ko dakenba, HNLC bobil dolni kosako Sadar police station-o mokordoma ka·aha.
“Inquiry-ko dakon, manderang HNLC bobil dolni tangka dabie seatgipa chittirangko man·soaha ine ma·sina man·ahani gimin bobil dolni kosako mokordomako ka·e, sandirokna a·bachengataha,” ine police officer aganaha.
Ia police official-ni aganani gitade, tangka dabiani chittirangko man·sogipa mitam manderangde police-rangna badi ka·doangaha aro mitamrangba da·o seachi badi ka·anirangko dakna sikgiparang dongkuenga.
“HNLC bobil dolni manderang, Police Bazar jolrango bading chiwalenggipa manderangoniko lak 15 dabienga ine September-ni 16 tariko mande saksa badi ka·doangaha aro ia manderangko an·tangtangni mobile phone-rangko switch off ka·jachina ba phone nombor-rangko dingtangatjachina gitaba ka·mikkenatenga,” ine police officer aganaha.
Iandake tangka dabiani chittirangko man·sogenchimode police-rangna u·iatchina manderangko didiatengon, je manderangan bobil dolni dabiani gita tangkarangko on·engachim, uandakgipa manderangba niamo pangchake sastirangko man·ani ong·a ine police officer, mikrakataniko on·angaha.