AMPATI: Ia bilsini April jao me·chik bi·sa sakgniko Chenga Benga Mela-o drae til·ekaniko jegalna aro ia me·chik bi·sarangna kakket bichalko on·china dabie Sukrobar salo, Garo Students Union (GSU) Western Zone-ni dilanichi jinma tom·bimonge re·jomaniko, South West Garo Hills a·jani Ampati-o ong·atangaha.
Ia jinma tom·bimonge re·jomaniko ong·atanio, South West Garo Hills a·jani dingtang dingtang dolrang jekai, AHAM, AYWO, ADIL, FKJGP, ADE, MKSU, HSU aro uandakgipa dingtang dingtang dolrang baksana jolo songdongenggipa manderangba bak ra·angtokaha.
Ia tom·bimonganio dingtang dingtang dolni dilgiparang, jinmana aganprakengon, Chenga Benga Mela-o aro Garobadha-o me·chik bi·sarangko kragija dake til·ekdraanina jegaltokenba, ia a·selo jak donggipa pilak manderangkon rim·china dabiangtokaha.
Chenga Benga Mela-o me·chik bi·sa sakgniko drae til·ekanio mongsonggipa mandekode da·onan rim·na man·kujaenga ine an·tangtangni suk ong·gijaniko parakangtokengon, ia mandeko ta·raken rim·china aro rakbatgipa sastirangko on·china dingtang dingtang dolni dilgiparang dabiangtokaha.
Garo Hills-o drae til·ekanirangko jegalatengon, mikkangchi iandakgipa obostarang ong·taijana gita dos dakgipa manderangna rakgipa sastirangko on·china dingtang dingtang dilgiparang dabiangaha.
Ia tom·bimonganio jinmana aganprakanggipa manderangara, GSU Garobadha unit-ni president Alinford D Sangma, AYWO-South West Zone-ni president Mackenseng A Sangma, AHAM Garobadha unit-ni president Wester G Sangma, FKJGP Garobadha circle-ni president Anderson M Marak, MKSU-ni president Kandarpa Koch aro MHSU-ni dilgipa Bapu Hajong ong·a.
Indake ong·engon, Meghalaya Residential Safety & Security Act (MRSSA) 2016-ko a·doko ra·gatchina, South West Garo Hills a·jani District Selection Committee (DSC)-ko namdapatchina aro Trading by Non-Tribals (TNT) Act-ni ning·o rakbatgipa niamrangko ra·gatchina gitaba ia tom·anio dingtang dingtang dolni dilgiparang dabiangtokaha.
Til·ekdraa man·gipa me·chik bi·sarangna kakket bichalko on·china jinma dabia
Date:
Share post:
