TURA: Indian Constitution-ni Sixth Schedule-o Tribal-rangna on·gimin bilrangko pe·e Meghalaya a·dokni Chief Minister Conrad K Sangma-chi dilenggipa a·dok sorkari, Tura-o donggipa dingtang dingtang biaprangko kangdrana jotton ka·enga ine Tura-ni MDC aro BJP-ni state vice president Bernard N Marak matnangatenba, manigija ia niamko pe·angkua ong·ode a·dokni Chief Minister Conrad K Sangma aro General Administration Department (GAD) Minister Rakkam A Sangma-ko jera ra·grikna gita ra·bianggen ine mikrakataniko on·angaha.
Iani bidingo a·dokni GAD Minister Rakkam A Sangma-na sedoatengon, a·dok sorkaride Tribal ong·jani gimin a·arangko name ra·chenggijade Tribal-rangni a·arangko ra·sekna gita bilrang dongja ine Marak parakataha.
“BJP-na pu·ongipa kangal cholgri manderangni kosako NPP-chi dilenggipa a·dok sorkari, sinjete rona jotton ka·enga aro manderangni a·arangko GAD-ni a·a ine kangdraenba, ma·mong sorkarini on·enggipa namgnirangko ra·pana gita chol on·jaenga,” ine Tura MDC parakataha.
Marak-ni parakatani gitade, Nikwatgre-oni Walbakgre-ona bigha 1046 ong·gipa a·arang, ITI campus-o bigha 91 ong·gipa a·arang, Sepoy Colony-ni dereserved area-o bigha 150-na batgipa a·arang aro adita salrangna skangmangmangba Leper Colony-ni bigha 390-mang ong·gipa a·arangko a·dok sorkari, GAD-ni a·arang ine kangdraahachim.
“Ia a·arang pilakan A·kingni a·arangsa ong·a aro ia a·arango songdongenggipa bang·bata manderangnan Nokmarang a·ani lekkarangko on·manaha. Ia manderangoni mitamrangde a·a pattarangba dongachim indiba GHADC, a·brirango songdonggipa Tribal-rangna on·gimin bilko pe·e Nokma document grisa sorkari department-rangna a·a pattarangko on·skaaha,” ine Marak parakataha.
Tura-ni Leper Colony-ara GAD-ni a·a ong·ja ine jegalatskaengon, iani bidingo 2016 bilsio deputy commissioner an·tangan tale janapataha aro iako ua Chief Minister-naba forward ka·atahachim indiba state survey ba revenue department-o kam ka·enggipa manderang, ia a·ako GAD-ni a·a ine kangdraenba toangahani a·sel ia gittimo songdongenggipa manderang kenjagoktokna nangaha ine Tura MDC parakataha.
“Leper Colony-o songdongenggipa manderango Nokma Document donga indiba 2016 bilsio gitcham CEM W Ch Marak-ni somoio GHADC, Medical Department-na Nokma-na u·iatgija a·a pattako tarie on·aha,” ine Marak parakataha.
 |
ReplyForward
|
